Ný rannsókn undir forystu tveggja fræðimanna við
Háskólann á Akureyri, Þórodds Bjarnasonar og Ársæls Arnarssonar leiðir í ljós að lífsánægja barna sem
búa jafnt til skiptis hjá báðum foreldrum eftir skilnað er meiri en lífsánægja jafnaldra þeirra sem búa aðeins hjá
öðru foreldri.
Rannsóknin sem birtist í ISI tímaritinu Children & Society byggir á úrtaki 184 þúsund skólanema í 36 vestrænum löndum og sýnir fram á að þessi munur skýrist að hluta til af betri efnahagslegri stöðu foreldra sem kjósa slíkt fyrirkomulag. Góð tengsl við foreldra tengjast aukinni lífsánægju en skýra ekki sambandið milli búsetuforms og lífsánægju. Þá kemur fram að börn á Norðurlöndunum eru ánægðari með lífið en jafnaldrar þeirra á öðrum Vesturlöndum en þvert á væntingar kemur þetta samband ekki sérstaklega fram meðal skilnaðarbarna.
