Þriðjudaginn 26. janúar flytur Ásgeir Örn Jóhannsson, hdl. erindið
Að afla sér réttinda - laganám og annar undirbúningur á lögfræðitorgi kl. 12:00 í stofu L201.
Vorið 2008 voru í fyrsta skiptið útskrifaðir nemendur með meistaragráðu í lögfræði frá Háskólanum á
Akureyri. Nemdendur úr fyrstu tveimur útskriftarárgöngunum vinna nú sem lögfræðingar víða um land og þeir fyrstu hafa þegar
aflað sér réttinda til að flytja mál í héraði og mega því kalla sig héraðsdómslögmenn. Allir lögmenn eru
lögfræðingar, þ.e. hafa lokið B.A. eða B.S. prófi og meistaragráðu í lögfræði við lagadeild háskóla sem
viðurkenndur er hér á landi.
Til þess að öðlast málflutningsréttindi fyrir héraðsdómstólum þarf lögfræðingur að sækja sérstakt
námskeið og standast bóklega og verklega prófraun, sem nær til þeirra þátta sem snúa að störfum lögmanna, þar á
meðal siðareglna lögmanna.
Í erindi sínu ræðir Ásgeir Örn Jóhannsson, hdl. um reynslu sína af námi við lagadeild Háskólans á Akureyri en hann
var einn þeirra sem útskrifuðust frá deildinni vorið 2008. Ásgeir fjallar um það hvernig námið hafi dugað honum sem undirbúningur
fyrir lögfræðistörf almennt og námskeiðið sem ætlað er til undirbúnings fyrir þá sem vilja afla sér réttinda sem
héraðsdómslögmenn.
