Háskólinn á Akureyri

Samtals verða 27 erlendir skiptinemar í námi við HA á þessari önn, þar af 24 í staðbundnu námi en 3 í verknámi.Aldrei áður hafa eins margir skiptinemar verið við HA á einu skólaári og er það líklega vegna stöðu íslensku krónunnar gagnvart erlendum gjaldmiðlum. Nemendur koma frá 11 ólíkum þjóðlöndum og er dreifing milli landa svipuð og síðustu ár, hins vegar er einn nemandi frá nýjum samstarfsskóla HA í Rúmeníu hér í fyrsta skiptið. HA er stöðugt að auka við nemenda-og kennaraskiptasamninga sem gefur nemendum HA einnig fjölbreyttari möguleika á skiptinámi. Skiptinemar-og kennarar setja alþjóðlegan blæ á háskólaumhverfið og koma með hugmyndir og nýjungar inn í fjölbreytt starf HA.

Nú fer í hönd undirbúningur nemenda sem ætla sér að fara í skiptinám erlendis fyrir næstkomandi skólaár. Nemendur eru hvattir til að hafa samband við alþjóðafulltrúa HA (runarg@unak.is, K108, 460-8035) til að afla sér frekari upplýsinga um möguleikana sem eru í boði.