Sunnudaginn 21. febrúar var efnt til opinnar dagskrár á Hótel KEA, Akureyri í tilefni af GoREd deginum sem
er hluti af alheimsátaki til vakningar um hjarta- og æðasjúkdóma kvenna. Einnig var í boði fjölbreytt hreyfidagsskrá víða um
bæinn í boði heilsurækta bæjarins og skíðafélags Akureyrar. Myndir frá deginum á
Akureyri má sjá í myndasafni hér.
GoRed dagurinn þótti mjög vel heppnaður. Um 150 rauðklæddar konur og karlar mættu á Hótel KEA og hlýddu á ýmis fræðsluerindi flutt m.a. af Gunnari Þór hjartasérfræðingi og Jóhönnu Kristjánsdóttur hjúkrunarfræðingi. Kvennakór Akureyrar söng og Leikfélagið á Akureyri var með atriði úr Rocky horror. Þrátt fyrir alvarlegt málefni sem mikilvægt er að vekja stöðuga athygli á einkenndist dagurinn af léttu og notalegu andrúmslofti og voru gestir leystir út með gjöfum í dagskrárlok.
Tilgangur GoRed dagsins er að fræða konur um áhættuþætti og einkenni hjarta- og æðasjúkdóma og hvernig draga má úr líkum á sjúkdómunum. Verndari átaksins hér á landi er Ingibjörg Pálmadóttir, fyrrum heilbrigðisráðherra. Þess ber að geta að þennan dag var einnig glæsileg dagsskrá haldin í Háskóla Íslands í Reykjavík.
GoRed dagurinn á Akureyri var samstarfsverkefni Háskólans á Akureyri, Hjartaverndar, Hjarta og lungnastöðvarinnar Bjargi, Hjartaverndar Norðurlands, Hjartaheillar og Hjartasjúkdómafélagsins.
