Háskólinn á Akureyri

Markmið og innritunarskilyrði
Rannsóknatengt meistaranám er ætlað þeim sem vilja efla starfshæfni sína og sérþekkingu á sviði menntavísinda og byggja upp sérhæfingu í rannsóknum á því sviði. Markmið námsins er að efla nemendur til þess að takast á við viðfangsefni á þessu sviði ásamt því að auka hæfni þeirra til þess að stunda frekara nám.
Innritunarskilyrði í M.A.-nám er 1. einkunn. Þeir sem ljúka 60 eininga viðbótarnámi í menntavísindum eða sambærilegu námi með 1. einkunn geta einnig innritað sig. Hámarksnámstími er fjögur ár.

Í náminu eru tvö leiðarstef: Gagnrýnin hugsun og ígrundað starf.

Námsskipan
M.A.-námið skiptist í kjarnanámskeið, námskeið á áherslusviðum og meistaraprófsritgerð (sjá yfirlit í töflu 1). Í kjarna eru í boði fjögur námskeið, tvö í aðferðafræði og tvö í menntavísindum. Af þeim verða allir að taka tvö námskeið, eitt námskeið í aðferðafræði og eitt í menntavísindum, og velja nemendur sér þau. Boðið er uppá námskeið á sex áherslusviðum: almennu sviði, lestrarfræði, námskrár- og kennslufræði, opinberri stefnumótun, menntastefnu og þróun skóla, sérkennslufræði og loks stjórnun og forystu (60 einingar hvert áherslusvið). Við upphaf náms skráir nemandi sig í námskeið á tilgreindu áherslusviði. Allir sem velja viðkomandi áherslusvið verða að taka það námskeið sem tilgreint er fyrst í upptalningu námskeiða sem í boði eru á hverju áherslusviði fyrir sig. Fjöldi eininga sem nemandi les á áherslusviði fer eftir stærð lokaverkefnis.

Lokaverkefni, meistaraprófsritgerð, skal vera á því áherslusviði sem nemandi velur sér. Nemendur á almennu sviði velja sér áherslu innan ramma menntavísinda. Lokaverkefni getur verið 40, 60 eða 90 einingar og ákveða nemendur stærð lokaverkefnis. Unnt er að skrá sig í lesnámskeiðum og meistaraprófsritgerð á hvoru misseri sem er eftir að forkröfur (sjá námskeiðslýsingar í kennsluskrá) hafa verið uppfylltar. Um lokaverkefni gilda sérstakar leiðbeiningar.

Kennsla fer fram í staðbundnum lotum fjórum sinnum á misseri að öllu jöfnu en að öðru leyti fer námið fram með breytilegu fjarnámssniði. Gerð er krafa um ákveðna tímasókn í námskeið. Hægt er að stunda fullt nám en nemandi ræður námshraða sínum. Öll námskeið nema lokaverkefni eru 10 einingar.

Nemendur geta sótt um að taka hluta námsins við aðra háskóla, sem gestnám við innlenda háskóla sbr. samning opinberra háskóla á Íslandi um gagnkvæman aðgang nemenda að námskeiðum eða sem skiptinám við erlenda háskóla sbr. reglur um skiptinám. Nemendur þurfa að kynna sér reglurnar á vef kennaradeildar og sækja um gesta- og skiptinám til matsnefndar kennaradeildar.

Matsnefnd metur óskir um mat á fyrra námi. Nemendur sem óska eftir mati á námi þurfa að kynna sér matsreglur (http://www.unak.is/kennaradeild/page/reglur_matsnefndar). Erindi skal senda skrifstofu hug- og félagsvísindasviðs.
 

Áherslusvið og námskeið í M.A.-námi

Tafla 1.

Námskeið í M.A.-námi og áætlun um framboð þeirra