Háskólinn á Akureyri

Samstarfsaðilar: Mannvit ehf; Prokatin ehf

Mannafli: 1-2

Tími: 2 ár

Kostnaður: 16 milljónir / Mótframlag er til við HA (Jóhann Örlygsson)

Stutt lýsing
Verkefnið er hluti af orkulíftækni sem hefur verið byggð upp við Háskólann á Akureyri (sjá hér að framan). Verkefnið "Prótein úr Vetni" hefur verið í gangi við Háskólann á Akureyri frá árinu 2005 með styrk úr Líftæknineti í auðlindanýtingu og Tækniþróunarsjóði. Grunnhugmyndin fyrir því að farið var út í þetta verkefni var að athuga þá möguleika sem hitakærar efnafrumbjarga bakteríur sem geta vaxið á vetni hafa í för með sér. Meginmarkmiðið var að einangra og greina slíkar bakteríur og athuga hvort hægt væri að framleiða einfrumuprótein úr þeim auðlindum sem Ísland á í formi jarðgufugass. Í raun er því hugmyndin að framleiða verðmæti (prótein) úr úrgangi (jarðgufugas). Slíkt prótein mætti nýta til þess að blanda í fóður í fiskeldi. Búið er að gera hagkvæmnismat á slíkri framleiðslu (Mannvit) og tilraunuppsetningu á Nesjavöllum í samvinnu við Orkuveitu Reykjavíkur og líftæknifyrirtækið Prokatin sem var stofnað í kringum verkefnið. Einn meistaranemandi hefur einnig unnið í verkefninu (2005-7) á launum og samanlagt eru um 4-5 ársverk sem hafa skapast í kringum þetta verkefni (nokkrir starfsmenn hafa unnið í verkefninu á sumrin). Augljós samlegðaráhrif eru að tengja hér saman stærstu verkfræðistofu landsins og framsækið líftæknifyrirtæki við háskóla á landsbyggðinni í rannsóknum og þróunarvinnu á verðmætasköpun. Undirritaður telur að fjöldi sprota (spin off) verkefna gætu skapast í kringum þetta verkefni í náinni framtíð sem gæti verði bæði atvinnu- og verðmætaskapandi. Verkefnið er einnig mjög umhverfisvænt þar sem þær bakteríur sem um ræðir nýta sér ekki einungis vetni heldur binda þær einnig koltvísýring sem fyrirfinnst í jarðgufugasinu. Eitt sprotaverkefni úr þessu gæti því verið að hreinsa upp jarðgufugas með áherslu á að minnka koltvísýrings mengun frá jarðvarmavirkjunum eða úr annarri stóriðju.

Hugmyndasmiður: Jóhann Örlygsson (HA)/Ásgeir Ívarsson (Mannvit)