Reglur um framhaldsnám

Brauðmolar

Forsíða » Heilbrigðisvísindasvið » Diplómu- og meistaranám » Reglur um framhaldsnám

1. gr. Stjórnskipulag, markmið og stefna

1.1. Framhaldsnámsdeild í heilbrigðisvísindum
Framhaldsnámsdeild innan heilbrigðisvísindasviðs Háskólans á Akureyri býður upp á framhaldsnám til meistaragráðu (M.S.) og diplómu í heilbrigðisvísindum og stendur fyrir rannsóknum í heilbrigðisvísindum í samræmi við stefnu og grunnmarkmið heilbrigðisvísindasviðs og stefnu Háskólans á Akureyri hverju sinni. Deildarformaður og deildarfundur bera ábyrgð á kennslu, kennslufyrirkomulagi og þróun náms innan deildarinnar.

1.2. Deildarfundur
Deildarfundur gerir tillögur til deildarráðs um að auglýsa stöður, fjalla um umsóknir að fengnu dómnefndaráliti og gerir tillögur til forseta heilbrigðisvísindasviðs um ráðningar. Deildarfund skipa forseti heilbrigðisvísindasviðs, deildarformaður og umsjónarkennarar námskeiða við deildina. Meginhlutverk deildarfundar er að fjalla um og afgreiða umsóknir um nám við deildina, sinna ýmsum málefnum er tengjast náminu sjálfu og málefnum framhaldsnema, sem og öðrum þeim málum sem heilbrigðisvísindasvið eða háskólaráð kann að fela honum.

1.3. Deildarformaður
Deildarformaður skal kosinn af deildarfundi til tveggja ára í senn, úr hópi fastráðinna lektora, dósenta eða prófessora deildarinnar. Einnig skal deildarfundur kjósa staðgengil deildarformanns til sama tíma. Einungis deildarfundur getur leyft frávik frá þessum ákvæðum. Deildarformaður ber ábyrgð á starfsemi deildar, skipulagi, undirbúningi og framkvæmd náms, þróun og samskiptum og tekur einnig þátt í stjórn deildar. Hann sér um samskipti við nemendur, áætlun kennslumagns, gerir tillögur um nýráðningar, velur umsjónarkennara í samráði við forseta heilbrigðisvísindasviðs og kemur að stundarskrárgerð í samvinnu við skrifstofu deildar. Deildarformaður stýrir deildarfundum og fylgir samþykktum fundanna eftir. Nánar er kveðið á um ábyrgð og verkefni deildarformanns í sérstakri starfslýsingu.

1.4. Námsnefnd framhaldsnáms
Námsnefnd framhaldsnáms gerir tillögur til deildarfundar um breytingar á náms- og kennsluskrá. Námsnefnd er skipuð þremur fulltrúum kennara sem valdir eru til tveggja ára í senn af deildarfundi og einum fulltrúa nemenda, sem valinn er af félagasamtökum þeirra til eins ár s í senn. Deildarformaður er að jafnaði formaður námsnefndar en að öðru leyti skiptir nefndin sjálf með sér verkum.

1.5. Matsnefnd framhaldsnáms
Matsnefnd framhaldsnáms gerir tillögur um mat á fyrra námi og fyrirhuguðu skiptinámi framhaldsnema. Matsnefnd er skipuð þremur fulltrúum kennara sem valdir eru af deildarfundi til tveggja ára í senn.

2. gr. Skilyrði til innritunar í framhaldsnám í heilbrigðisvísindum
Umsækjandi sem hefur lokið bakkalárgráðu á sviði heilbrigðisvísinda og skyldra greina, með að öllu jöfnu fyrstu einkunn, frá viðurkenndri háskólastofnun getur sótt um framhaldsnám við heilbrigðisdeild. Deildarfundur skal hverju sinni meta hvort samsetning fyrstu háskólagráðu tryggi nægilega undirstöðu undir framhaldsnámið. Deildarfundur getur veitt undanþágu frá almennum inntökuskilyrðum þegar um einstök námskeið er að ræða. Innritun í einstök námskeið skal vera háð samþykki umsjónarkennara viðkomandi námskeiðs.

3. gr. Einingafjöldi og tímalengd náms
Nám til meistaraprófs í heilbrigðisvísindum er 120 einingar að afloknu bakkalárprófi og til diplómaprófs 40 einingar. Fullt nám á einu skólaári er 60 einingar.
Hámarksnámstími til meistaraprófs er 5 ár, en til diplómaprófs 3 ár. Deildarfundi er heimilt að veita undantekningar varðandi hámarksnámstíma.

4. gr. Námsáætlun
a) Meistaranemi gerir drög að áætlun um meistaranám sitt á sínu fyrsta misseri. Þar skal geta þeirra námskeiða sem neminn hyggst taka og stutt drög að meistararannsókn hans.
Þegar meistaranemi hefur skráð sig í MPR0130 Meistararannsókn fær hann leiðbeinanda og leggur fram áætlun um meistararannsóknina sem hann vinnur í samráði við leiðbeinanda sinn. Rannsóknaráætlun sem samþykkt hefur verið af Vísindasiðanefnd eða öðrum opinberum siðanefndum telst fullgild rannsóknaráætlun.
b) Diplómanemi gerir drög að áætlun um diplómanám sitt á sínu fyrsta misseri. Þar skal geta þeirra námskeiða sem neminn hyggst taka.

5. gr. Meistaranefnd og hlutverk hennar
Deildarformaður skipar meistaranefnd í samráði við deildarfundarfulltrúa. Í nefndinni er leiðbeinandi sem leiðbeinir meistaranemanum í náminu og að jafnaði einn ráðgjafi. Hlutverk leiðbeinandans er að fylgjast með að framgangur námsins sé í samræmi við námsáætlun og tryggja fagleg gæði rannsóknarvinnunnar. Nánar er kveðið á um hlutverk leiðbeinanda og ráðgjafa í sérstakri starfslýsingu og gerður um framlag þeirra skriflegur samningur. Heimilt er, með samþykki deildarfundar, að leiðbeinendur séu utan HA. Sex vikum áður en til mats á meistararitgerð kemur skilar leiðbeinandi rökstuddu áliti til deildarformanns um það hvort veita skuli meistaranemanum kost á að leggja ritgerð fram sem hluta af meistaragráðu.

6. gr. Námskröfur
a) Nám til meistaraprófs er minnst 120 einingar að lokinni fyrstu háskólagráðu. Meistaraneminn skal hafa lokið þremur skyldunámskeiðum framhaldsnámsins og valnámskeiðum til viðbótar með viðunandi árangri að mati deildarfundar. Meistararitgerð vegur að öllu jöfnu 60 einingar og skal byggjast á rannsókn. Deildarfundi er heimilt að veita undantekningar á einingafjölda fyrir meistararitgerð, þó aldrei svo að meistararitgerð vegi meira en 90 einingar eða minna en 40 einingar.
Rannsóknarefni velur meistaraneminn í samráði við leiðbeinanda sinn. Meistaraneminn lýkur rannsókn sinni með því að skrifa meistararitgerð og tímaritsgrein fyrir ritrýnt tímarit á fræðasviðinu. Hann gerir jafnframt grein fyrir niðurstöðum sínum í almennum fyrirlestri við Háskólann á Akureyri.

b) Nám til diplómaprófs í heilbrigðisvísindum er 40 einingar að lokinni fyrstu háskólagráðu.

7. gr. Framvinda meistararannsóknar

7.1 Meistararitgerð
Markmið meistararitgerðar er að veita þjálfun í vísindalegum vinnubrögðum. Ritgerðin verður að standast strangar kröfur á öllum sviðum. Í upphafi slíkrar ritgerðar skal gera skýra grein fyrir viðfangsefninu, þeim spurningum sem bornar voru upp og rannsóknaraðferðum. Niðurstöður skal setja skýrt og aðgengilega fram og fjalla um þær í fræðilegu samhengi. Almenn krafa til meistararitgerða er að þar sé fylgt viðurkenndum vísindalegum rannsóknaraðferðum og fagmannlegum frágangi og að þær séu sjálfstætt framlag til þekkingarþróunar á fræðasviði sínu. Í hverri meistararitgerð skal vera útdráttur á íslensku og ensku. Koma skal skýrt fram að verkefnið er unnið við heilbrigðisvísindasvið Háskólans á Akureyri og geta skal aðalleiðbeinanda sérstaklega og síðan ráðgjafa. Þá skal geta þeirra sjóða sem styrkt hafa verkefnið. 60 eininga meistararitgerð skal vera 20.000 orð að jafnaði (+/- 10%), 40 eininga ritgerð skal að jafnaði vera 15.000 orð (+/- 10%).
Sérstakar leiðbeiningar skulu tiltækar til leiðsagnar meistaranemum í ritgerðarsmíðinni.

7.2. Tímaritsgrein
Meistaraneminn skal skrifa tímaritsgrein fyrir ritrýnt tímarit á viðkomandi fræðasviði þar sem hann gerir grein fyrir meistararannsókn sinni. Markmið ritunar tímaritsgreinar er að veita meistaranemanum þjálfun í að skrifa tímaritsgrein fyrir ritrýnt tímarit. Leiðbeinandi er ætíð meðhöfundur enda tekur hann beinan þátt í rannsókninni og skrifunum í gegnum leiðbeiningar sínar. Hann sér um að senda tímaritsgreinina til birtingar og gera þær betrumbætur á henni sem viðkomandi tímarit kann að krefjast í samráði við meistaranemann. Sérstaklega skal semja um það í upphafi rannsóknarferlisins ef ráðgjafi er meðhöfundur en þá er gert ráð fyrir að ráðgjafi taki drjúgan þátt í rannsóknarvinnunni og leiðsögninni.

7.3. Fyrirlestur
Meistaraneminn skal flytja opinn fyrirlestur í málstofu á vegum heilbrigðisvísindasviðs til að kynna rannsóknarniðurstöður sínar. Markmið fyrirlestrarins er að þjálfa meistaranemann í að koma rannsóknarniðurstöðum á framfæri með töluðum orðum og taka við og svara fyrirspurnum. Fyrirlesturinn skal auglýstur opinberlega.
Leiðbeinandi er alltaf meðhöfundur á öllum opinberum fyrirlestrum þar sem rannsóknin er kynnt, hvort sem um er að ræða innlendar eða erlendar málstofur eða ráðstefnur. Sérstaklega skal um það semja hvort ráðgjafi er einnig meðhöfundur.

7.4. Mat á meistararitgerð
Meistaranefndin skal meta meistararitgerðina áður en til mats prófdómara kemur. Þegar meistaranema hefur verið gefinn kostur á að leggja ritgerð fram skal deildarformaður tilnefna prófdómara. Prófdómari gefur einkunn fyrir ritgerðina. Gildir sú einkunn til jafns við einkunn meistaranefndarinnar sem gefur einkunn fyrir allt ferlið. Nánar er kveðið á um fyrirgjöf fyrir meistaraverkefni í sérstakri samþykkt deildarfundar.

8. gr. Tengsl við aðra háskóla
Heimilt er að veita meistaragráðu sameiginlega með öðrum háskóla. Í þeim tilvikum skal um það gera skriflegan samning.