Háskólinn á Akureyri býður upp á vandað og yfirgripsmikið námsframboð á mörgum sviðum
Háskólinn á Akureyri leggur áherslu á persónulega þjónustu og státar af fjölbreyttu og fjörugu félagslífi
Háskólinn á Akureyri var stofnaður 1987 og hefur stækkað hratt og örugglega síðan þá
Í náminu er lögð áhersla á að fræðast um mannlega hegðun, hugsun og tilfinningar. Sálfræðinámið er víðtækt og opnar margar dyr til starfa og frekara náms.
Sérstaða sálfræðinámsins við Háskólann á Akureyri felst í sveigjanlegu námi og námsmati.
Námsmat er fjölbreytt. Í flestum námskeiðum eru lokapróf í bland við annað námsmat sem felst meðal annars í hlutaprófum, verkefnum, umræðum, sýnikennslu, tilraunum og rannsóknum á vettvangi.
Samkeppnispróf eru haldin við lok fyrsta misseris sem ákvarða hver fá að halda áfram námi á vormisseri fyrsta árs.
Sálfræði við HA er spennandi og krefjandi nám sem gefur þér tækifæri til að öðlast grunnþekkingu á mörgum sviðum sálfræðinnar. Í náminu er mikil áhersla lögð á rannsóknaraðferðir, tölfræði og mælifræði, og þú færð tækifæri til að taka þátt í rannsóknum sem þátttakandi og rannsakandi.
Þú kynnist fjölmörgum sviðum sálfræðinnar, frá virkni taugafruma upp í hegðun fólks í hópum. Þarna á milli eru spennandi viðfangsefni á borð við: skynhrif og skynjun, virkni meðvitundar, persónuleika, minni og nám, geðkvilla og meðferð þeirra, virkni lyfja á hegðun, atferlisgreiningu, þroska frá vöggu til grafar, gerð prófa og spurningalista, frammistöðu í íþróttum og á vinnustöðum, og fleira til.
Námið fer fram á ensku og íslensku. Lesefni er að langmestu leyti á ensku, en kennsla ýmist á ensku eða íslensku. Því er æskilegt að umsækjendur búi yfir hæfni í þessum tungumálum sem samsvarar að minnsta kosti B2 í evrópska tungumálarammanum. Umsækjendur bera sjálfir ábyrgð á að meta eigin tungumálakunnáttu.
Námið opnar margar dyr. Brautskráðir stúdentar vinna fjölbreytt störf, meðal annars á sviði rannsókna, menntunar, ráðgjafar, umönnunar, forvarna og í viðskiptalífinu.
Námið opnar leið að framhaldsnámi á mörgum sviðum sálfræðinnar og tengdum greinum eins og í mannauðsstjórnun, fjölskylduráðgjöf, talmeinafræði, lýðheilsuvísindum, náms- og starfsráðgjöf og mörgum fleiri. Sálfræðimenntað fólk er einnig vinsælir starfskraftar í markaðsdeildum fyrirtækja og auglýsingastofa og í ýmis konar gagnagreiningarvinnu.
Með klínísku framhaldsnámi getur þú öðlast starfsréttindi sem sálfræðingur. Sálfræðingar starfa víða, til dæmis í skólum, á sjúkrahúsum, við ráðgjöf og meðferðarvinnu.
Félagslíf er mikilvægur þáttur háskólanáms og er félagslíf stúdenta við HA öflugt.
Allir stúdentar við háskólann eru í Stúdentafélagi Háskólans á Akureyri (SHA) en einnig er hver deild með sitt stúdentafélag. Kumpáni er félag félagsvísinda- og sálfræðistúdenta og þú getur nálgast nánari upplýsingar um félagið á Facebook.
Almenn krafa er að umsækjendur hafi lokið stúdentsprófi, lokaprófi frá framhaldsskóla á þriðja hæfniþrepi, jafngildu erlendu prófi eða 60 ECTS einingum frá viðurkenndum háskóla. Á vef Menntamálastofnunar má sjá hæfniþrep námsbrauta á framhaldsskólastigi.
Þeir 60 stúdentar sem ná hæstri meðaleinkunn úr námskeiðunum Inngangur og undirstöður sálfræði og Tilraunasálfræði á haustmisseris á 1. námsári geta haldið áfram með námið.
Samkeppnispróf eru haldin við lok haustmisseris á 1. námsári í sálfræði. Þeir 60 stúdentar sem ná hæstri meðaleinkunn úr námskeiðunum Inngangur og undirstöður sálfræði og Tilraunasálfræði geta haldið áfram með námið.
Stúdentar sem standast ekki samkeppnispróf geta ekki haldið sálfræðinámi áfram á vormisseri.
Nánari upplýsingar má finna í Reglum Háskólans á Akureyri, undir stúdentar.
Allt grunnnám við Háskólann á Akureyri er sveigjanlegt nám sem þýðir að engu skiptir hvort þú ert staðarnemi eða fjarnemi. Allir fylgja sömu námskrá og námskröfur eru þær sömu.
Flestir hefðbundnir fyrirlestrar eru teknir upp og settir á kennsluvef. Þannig getur þú horft á fyrirlestra þegar þér hentar og eins oft og þú vilt.
Skylda er að koma einu sinni á misseri í stuttar kennslulotur til Akureyrar þar sem megináhersla er lögð á verkefnavinnu, umræður og verklega kennslu. Þar gefst þér tækifæri til að hitta kennara, samnemendur og annað starfsfólk háskólans og tengjast enn betur háskólasamfélaginu þínu.
Stúdentar í sálfræðinámi mega búast við að einhver hluti námsins fari fram með rauntímakennslu með mætingarskyldu. Utan staðlotu er alltaf hægt að uppfylla mætingarskyldu með rafrænni mætingu.
Vinsamlega athugið að hver vika í fullu háskólanámi er ígildi 50-60 stunda vinnuviku.
Hér getur þú lesið meira um sveigjanlega námið og séð hvenær námslotur eru.
Allir stúdentar eiga kost á að taka hluta af námi sínu við erlenda samstarfsháskóla. Þú færð niðurfellingu á skólagjöldum gestaskólans og greiðir eingöngu innritunargjald í HA. Alþjóðafulltrúi aðstoðar þig við að sækja um námið, húsnæði og nemendastyrk.
Ég get eindregið mælt með Háskólanum á Akureyri þar sem aðgengi að kennurum er gott og andrúmsloftið afslappað, það sem stendur upp úr er einstaklega góð þjónusta og gott viðmót starfsfólks á bókasafni skólans sem auðveldaði mér námið á svo margan hátt með faglegri aðstoð og bros á vör. Ég hef góða reynslu af sálfræðináminu við Háskólann á Akureyri, en það er frábær grunnur fyrir stjórnunarstörf þar sem stjórnun snýr að miklu leyti að samskiptum við fólk.
Sálfræðinám er frábær grunnur fyrir alla hvort heldur sem þeir ætla út á vinnumarkaðinn eða í frekara nám. Námið opnar fjölmargar aðrar námsleiðir en er á sama tíma góður undirbúningur fyrir lífið þar sem nemendur öðlast þekking og kunnáttu sem þeir búa að alla ævi. Námið er sveigjanlegt og umfram allt áhugavert, hvort sem þú stefnir á starfsréttindi sem sálfræðingur, framhaldsnám í mannauðstjórnun, kennsluréttindi eða einfaldlega að þroska þig sem persónu.
Námskeiðið leggur grunn að háskólanámi með því að þjálfa nemendur í fræðilegum vinnubrögðum. Í námskeiðinu er farið ítarlega í notkun heimilda, s.s. rafræna heimildaleit, tilvísun í heimildir og heimildaskráningu. Áhersla er lögð á ritgerðasmíð, uppbyggingu ritgerða og skýrslna og verklag við slíka vinnu. Nemendur eru þjálfaðir í skrifum, gagnrýni, rökstuðningi, uppsetningu og frágangi ritgerða.
Í námskeiðinu er lögð áhersla á skilning á hönnun og framkvæmd tilrauna í sálfræði. Stúdentar fræðast um feril tilrauna, frá rannsóknarspurninga til ritrýni. Farið er yfir réttmætishugtakið í vísindum og nauðsynlegar ráðstafanir við stjórnun tilraunaumhverfis, þannig að afhjúpa megi orsakasambönd með skipulagðri tilgátuprófun. Stúdentar læra einnig um mismunandi mælikvarða breytna og um áreiðanleika mælinga. Í námskeiðinu eru kostir og gallar hinna ýmsu tilraunasniða, einkunn innan- og millihópasnið, fjölbreytusnið (þáttasnið), skoðaðir og hvenær er viðeigandi að nota hvert þeirra. Tilraunasniðin eru svo borin við hin ýmsu tengslasnið, svo sem hálftilraunir, mismunarannsóknir og fylgnisnið. Stúdentar fræðast um siðferðisreglur og -viðmið í rannsóknum á mönnum og dýrum og kynnast því hvernig skuli greina frá niðurstöðum rannsókna í skýrslu á APA formi. Þá eru stúdentar undirbúnir fyrir frekara nám í aðferða- og tölfræði með kynningu á túlkun á framsetningu gagna og grunnhugtökum tölfræðinnar.
Í námskeiðinu verður farið yfir grundvallaratriði í aðferðafræði hug- og félagsvísinda. Að loknu námskeiði ættu nemendur að geta gert grein fyrir helstu rannsóknaraðferðum. Fjallað er um rannsóknarsnið, gagnaöflunaraðferðir, úrtök og önnur hugtök aðferðafræðinnar. Rætt verður um styrkleika og takmarkanir mismunandi aðferða í hug- og félagsvísindum með hliðsjón af ólíkum markmiðum rannsókna. Hluti kennslunnar fer þannig fram að gestakennarar kynna rannsóknir sínar fyrir nemendum, með áherslu á aðferðafræðiþáttinn.
Í þessu námskeiði verður fjallað um vísindagreinina sálfræði; hugmyndafræðilegar rætur, sjónarhorn, hugtök, kenningar, vísindalega hugsun og aðferðir. Einnig verður fjallað um sálfræði sem sérfræðigrein og gefið yfirlit yfir viðfangsefni og starfshætti greinarinnar nú til dags. Jafnframt verður gefið yfirlit yfir mismunandi viðfangsefni sálfræði s.s. þroska, áhugahvöt og tilfinningar, heilsu, persónuleika, félagsskilning, geðraskanir, líffræðilegar undirstöður hegðunar, skynjun, minni, meðvitund, tungumál og hugsun, greind, nám og samspil umhverfis og erfða á manneskjuna.
Námskeiðið snýst um þroskaferli manneskjunnar frá móðurkviði til unglingsára. Hlutur erfðaþátta, lífeðlislegra þátta og félagslegra þátta í þroska verður rætt ásamt hluti sálrænna og félagslegra þátta, sem og samspili þessara tveggja meginorsaka breytileika á þroska. Fjallað er um lykilkenningar og sjónarhorn eins og þau snúa að líkamlegum, hugrænum, félagslegum og tilfinningalegum þáttum þroska, með áherslu á mikilvæg þroskaskeið.
Námskeiðið er inngangsámskeið í tölfræði, ætlað sem undirbúningur fyrir frekara nám í tölfræði og aðferðafræði rannsókna. Efnistök spanna undirstöðuatriði frá Fjallað er um þær efnislegu umbreytingar sem urðu á Vesturlöndum, einkum frá 18. öld og fram til okkar daga. Hugað verður sérstaklega að nokkrum lykilbreytingum, þar á meðal að iðnvæðingunni, upphafi og endalokum nýlendukerfisins, og hnattvæðingunni, jafnframt því sem innbyrðis tengsl þessara þróunarferla verða skoðuð. Sérstök áhersla verður lögð á þær breytingar sem áttu sér stað á Íslandi á 19. og 20. öld og tengsl þeirra við samskonar breytingar á öðrum stöðum í heiminum.
Markmið námskeiðsins er að lýsa í hnotskurn og leggja mat á helstu fræðikerfi og rannsóknaraðferðir félagssálfræði. Farið verður m.a. í viðhorfamælingar, námskenningar, eignunarkenningar og fordóma. Kostir og gallar ólíkrar aðferðafræði í félagssálfræði verða skoðaðir með hliðsjón af þessum viðfangsefnum.
Í þessu námskeiði verður fjallað um fræðilegar undirstöður atferlisgreiningar. Fjallað verður um grundvallaratriði, lykilhugtök og lögmál klassískrar og virkar skilyrðingar. Einnig verður fjallað um kenningu Skinners um málhegðun. Að lokum verður atferlisgreining kynnt sem vísinda- og starfsgrein og mismunandi fræðasviðum hennar og tækni lýst.
Námskeiðið er þríþætt: Í fyrsta hluta er fjallað almennt um námssálfræði, í öðrum hluta er fjallað um nemendur og nám og í þriðja hluta er fjallað um kennara og kennslu.. Meðal umfjöllunarefna í fyrsta hluta eru m.a. undirstöður námssálfræði og mýtur um nám og kennslu. Í öðrum hluta eru efni m.a. byrjendur og sérfræðingar, nám og yfirfærsla, nám barna og lífeðlislegar undirstöður náms. Í öðrum hluta er m.a. farið í gerð námsumhverfis, kennsluaðferðir byggðar á rannsóknum í námssálfræði, náms- og kennslumat, nám kennara og notkun tækni við kennslu.
Starfandi sálfræðingar þurfa að fylgjast með stöðu þekkingar á sínu sérsviði. Þá er ekki nóg að vera kunnugt um niðurstöður rannsókna, heldur þurfa þeir að geta lagt gagnrýnið mat á rannsóknir og tekið afstöðu til þess hvort reynslugögn styðji ályktanir rannsakenda. Námskeiðinu er ætlað að þjálfa færni nemenda til að leggja gagnrýnið mat á sálfræðirannsóknir. Í hverri viku verður kafað ofan í nýlega sálfræðilega þekkingu og sjónum beint að ályktunum höfunda, rannsóknaraðferðum, tölfræðiaðferðum.
Fjallað verður um helstu þætti skynhrifa og skynjunar, með áherslu á sjónskynjun. Ferlar sjónskynjunar (svo sem litaskynjun, hlutaskynjun og dýptarskynjun), verða útskýrðir og áhersla lögð á hlutverk eftirtektar í skynúrvinnslu. Einnig verður fjallað í styttra máli um önnur skynfæri, svo sem heyrn, lykt og bragð. Nemendur kynnast aðferðum í rannsóknum á skynjun og fá kennslu í uppsetningu tilrauna og úrvinnslu niðurstaðna.
Í námskeiðinu kynnist nemandinn algengum taugasjúkdómum og geðröskunum, líffræðilega orsakir, greiningu og þverfræðilega meðferð. Sérstök áhersla verður á hlutverk sálfræðingsins við meðferð og mat. Nemendur mun læra um sálfélagslegar- og líffræðilegar kenningar um geðsjúkdóma. Að lokum verður lyfjafræði og lyfjahvarfræði tauga- og geðlyfja kynnt fyrir nemendum.
Í námskeiðinu verður líffræðileg sálfræði kynnt út frá þeim virknieiningum og ferlum taugakerfisins sem búa að baki hegðun og hugarstarfi. Í námskeiðinu verður fjallað um virkni einstakra taugafrumna, skipulagi og virkni taugaboðkerfisins, auk líffrærafræði taugakerfisins. Fjallað verður um og stjórn hreyfinga.
Kenndar eru nokkrar helstu úrvinnsluaðferðir innan ályktunartölfræði, s.s. fjölbreytugreining, dreifigreining, aðhvarfsgreining, tvíflokka aðhvarfsgreining, þáttagreining og áreiðanleikaprófun á kvörðum. Nemendur eiga að geta leyst úr verkefnum sem þessu tengjast með aðstoð viðeigandi tölfræðiforrita, túlkað niðurstöður og dregið viðeigandi ályktanir.
Námskeiðið er kynning á helstu umfjöllunarefnum hugfræðilegrar sálfræði. Nemendur munu læra um margvísleg hugræn ferlit, til dæmis minni, tungumál, ákvarðanatöku, rökhugsun og þrautalausnir. Námskeiðið mun veita innsýn inn í hugfræðilegar kenningar og hvernig rannsóknir á sviðinu hafa haft áhrif á rannsóknir og almennan skilning á hugarstarfi og hegðun.
Fjallað verður um fræðilegar undirstöður sálfræðilegra mælitækja og annarra matsaðferða. Einnig verður farið í helstu atriði varðandi samningu og gerð mælitækja og siðlega notkun þeirra, íslenska þýðingu og stöðlun, reikning, mat og greiningu á próffræðilegum eiginleikum sálfræðilegra mælitækja. Gefið verið stutt yfirlit yfir greindar- og persónuleikapróf þar sem áhersla verður lögð á próffræðilega uppbyggingu slíkra prófa. Nemendum verður einnig kennt að afla frekari upplýsinga um sálfræðileg mælitæki og meta þær upplýsingar á gagnrýninn hátt.
Í þessu námskeiði verður fjallað ítarlega um starfsemi og virkni heilans í tengslum við ýmiss hugarferli eins og minni, athygli, tungumál og hugsun. Fjallað verður um rannsóknir og farið ítarlega í þær aðferðir sem notaðar eru í hugrænum taugavísindum, svo sem heilalínurit (EEG) og segulómun (MRI; fMRI). Áhersla verður lögð á að skoða hvernig rannsóknir á sviði taugavísinda geta upplýst og styrkt kenningar hugfræðinnar. Einnig verður í þessu samhengi fjallað almennt um tengsl heila, huga og hegðunar.
Starfandi sálfræðingar þurfa að fylgjast með stöðu þekkingar á sínu sérsviði. Þá er ekki nóg að vera kunnugt um niðurstöður rannsókna, heldur þurfa þeir að geta lagt gagnrýnið mat á rannsóknir og tekið afstöðu til þess hvort reynslugögn styðji ályktanir rannsakenda. Námskeiðinu er ætlað að þjálfa færni nemenda til að leggja gagnrýnið mat á sálfræðirannsóknir. Í hverri viku verður kafað ofan í nýlega sálfræðilega þekkingu og sjónum beint að ályktunum höfunda, rannsóknaraðferðum, tölfræðiaðferðum.
Veitt er yfirlit yfir grunnþætti sálmeinafræði og afbrigðilegrar hegðunar. Fjallað er um helstu skilgreiningar geðrænna vandkvæða og afbrigðilegrar hegðunar. Auk þess er fjallað um hina flóknu keðju líffræðilegra, sálrænna og félagslegra þátta sem tengjast þróun geðraskana. Farið er yfir helstu sálfræðilegu kenningar og meðferðarnálganir við geðröskunum. Sérstök áhersla verður lögð á hugræna atferlismeðferð (HAM) og fleiri raunprófaðar meðferðir. Námskeiðið mun einnig veita nemendum grunnþekkingu á siðareglum sálfræðinga, viðtalstækni, og helstu greininga- og matsaðferðum innan klínískrar sálfræði.
Í námskeiðinu munu nemendur kynnast kenningum, rannsóknum og hagnýtingu innan íþróttasálfræði. Námskeiðið mun gefa yfirsýn á þætti sem hafa jákvæð og neikvæð áhrif á frammistöðu í íþróttum og skyldum vettvangi. Nemendur munu einnig fá kynningu á algengum geðheilsuþáttum sem snerta íþróttafólk og margvíslegum nálgunum til að bæta frammistöðu og geðheilsu meðal þessa hóps.
Lögð er áhersla á þætti sem tengjast andlegum, líkamlegum og félagslegum vexti og þroska mannsins frá upphafi fullorðinsáranna til grafar.
Fjallað verður um hugtakið „persónuleika“ og hver áhrif kenninga um persónuleika hafa verið í sálfræði. Farið verður í það hvaða þættir hafa áhrif á slíkar kenningar s.s. eins og klínískar athuganir, tilraunir, hugmyndir um það hvernig við lærum og sálmælingar. Að auki verður fjallað ítarlega um áhrifamestu kenningar um persónuleikann og hverjir eru kostir þeirra og ágallar.
Nemandinn framkvæmir rannsókn og skrifar um hana fræðilega ritgerð undir handleiðslu leiðbeinandans. Nemandinn velur viðfangsefni BS verkefnis í samráði við leiðbeinanda við Sálfræðideild. Nauðsynlegt er að fá formlegt samþykki fyrir viðfangsefninu hjá leiðbeinanda og umsjónarmanni B.S. verkefna í sálfræði og vinna það samkvæmt reglum deildarinnar um lokaverkefni.
Í námskeiðinu er fjallað um tengsl andlegs og líkamlegs heilbrigðis þar sem samspil sálfræðilegra, félagslegra og líffræðilegra þátta er skoðað og áhrif þess á heilbrigði, þróun sjúkdóma og viðbrögð við veikindum. Lögð er áhersla á kenningar tengdar heilbrigði og heilbrigðisvenjum og hugað sérstaklega að streitu og áhrifum streituviðbragða og félagslegs umhverfis á heilsu. Einnig verður fjallað um sálfræðilega þætti og tengsl þeirra við verkjastjórnun og við sjúkdóma á borð við krabbamein, sykursýki, alnæmi og hjarta- og æðasjúkdóma. Að lokum er fjallað um heilbrigðiskerfið og þær breytingar er hafa átt sér stað innan þess er kalla á aukin samskipti sjúklings og meðferðaraðila.
Katrín er verkefnastjóri við Sálfræðideild og námsbrautar í félagsvísindum við Félagsvísindadeild. Hún tekur vel á móti þér og svarar þeim fyrirspurnum sem þú kannt að hafa.