Brautskráning 23. maí 2008
Símenntun Háskólans á Akureyri brautskráði 23. maí sl. 10 nemendur sem hafa lagt stund á fjögurra missera rekstrar- og stjórnunarnám ætlað talsmönnum stéttarfélaga ASÍ og BSRB. Brautskráning fór fram í Listasafni ASÍ.
Námið sem er sérskipulagt í samstarfi við viðskipta- og raunvísindadeild Háskólans á Akureyri og Félagsmálaskóla alþýðu hófst í september 2004 og var skipulagt með þeim hætti að það mátti hefja í byrjun hvers misseris. Þá komu nemendur í Háskólann á Akureyri til að kynnast innbyrðis, kennurum, skólanum og þeirri tækni sem beitt er við kennsluna. Á hverju misseri hafa verið kenndar þrjár námsgreinar ein í senn og fara fyrirlestrar fram á Símenntunarmiðstöðvum þar sem nemendur eru hverju sinni. Námsgreinar eru: haglýsing, opinber stjórnsýsla, hagfræði, vinnuréttur, fjárhagsbókhald og greining ársreikninga, hagkerfi, stjórnun, upplýsingatækni, starfsmannastjórnun, áætlanagerð, stefnumótun og fjármál. Próf og verkefnaskil fara fram í vefnámsumhverfi háskólans (Blackboard). Alls hafa 47 talsmenn verkalýðshreyfingarinnar lokið þessu námi.
Ávörp fluttu: Gylfi Arnbjörnsson framkvæmdastjóri Alþýðusambands Íslands, Finnbjörn A. Hermannsson formaður skólanefndar Félagsmálaskóla alþýðu, Helgi Bergs staðgengill rektors og Björn Ágúst Sigurjónsson fyrir hönd nemenda.
Myndin er af nemendum og forsvarsmönnum námsins.
