Eftir nám stendur sjávarútvegsfræðingum margt til boða. Hingað til hefur megnið af útskrifuðum sjávarútvegsfræðingum haldið beint út í atvinnulífið, enda verið þörf á þeim þar. Um það bil helmingur þeirra endar í ýmsum stjórnunarstörfum í sjávarútvegi (sjá kökurit hér að neðan), en helmingur endar utan sjávarútvegsina. Flestir í einhverju tengdu fjármálum (í bönkum eða öðrum fjármálafyrirtækjum) eða rekstri fyrirtækja. Námið opnar því ýmsar dyr utan sjávarútvegsins.
Þá hafa margir einnig haldið áfram í frekara nám og þá yfirleitt erlendis. Margt stendur þar til boða en mjög mismunandi
forkröfur gilda þó hjá mismunandi háskólum og jafnvel deildum. Það er því ekki sjálfgefið að hægt sé að
ganga beint inn í meistaranám við erlendan háskóla þó sjávarútvegsnámi sé lokið. 
Auk náms við aðra háskóla stendur sjávarútvegsfræðingum einnig til boða þrjár leiðir til meistaranáms við HA. Í fyrsta lagi geta þeir farið beint í meistaranám í auðlindafræðum. Það nám er mjög verkefnamiðað og er það gert á einhverju af sérfræðisviðum kennara í auðlindafræðum, gjarnan í samstarfi við fyrirtæki eða stofnanir.
Í öðru lagi er hægt að fara í meistaranám í viðskiptafræðum. Hinsvegar þarf að uppfylla ákveðnar forkröfur,
því nemendur sem fara í það nám þurfa að hafa klárað fleiri einingar í viðskiptatengdum greinum en kenndar eru í
hefðbundnu sjávarútvegsfræðinámi. Nánar tiltekið eru þetta 24 ECTS einingar í viðbót eða 4 námsgreinar. Hægt er
að bæta þessum greinum við sig eftir að hefðbundnu sjávarútvegsfræðinámi er lokið en duglegir nemendur ættu líka að
geta tekið þessar greinar á meðan sjávarútvegsfræðináminu stendur.
Þriðja leiðin er að fara í meistaranám í strandsvæðastjórnun, það nám er kennt á Ísafirði á vegum Háskólaseturs Vestfjarða og er eingöngu kennt á ensku. Nemendur í þessu námi útskrifast frá Háskólanum á Akureyri.
