Sjávarútvegsfræði
Háskólinn á Akureyri býður einn íslenskra háskóla upp á þriggja ára nám í
sjávarútvegsfræðum til B.Sc gráðu. Námið er bæði í boði í staðarnámi og fjarnámi. Kennd eru
undirstöðunámskeið raun- og viðskiptagreina en sérnámskeið á sjávarútvegslínu eru um vistkerfi sjávar, rekstur,
veiðar, vinnslu og markaðssetningu sjávarafurða. Á síðasta námsári vinnur nemandinn lokaverkefni samhliða námskeiðum. Að
námi loknu getur nemandinn kallað sig sjávarútvegsfræðing. (lesa meira)
Þverfaglegt nám
Nám í sjávarútvegsfræðum er mjög vítt og krefst þess að nemandinn kunni skil á grunnhugtökum
í raunvísindum og viðskiptum sem og þáttum er snerta sjávarútveginn beint. Námið er því mjög þverfaglegt og nokkuð
sérstakt í íslenskri námsflóru. (lesa meira)
Markmið
Markmið námsins er að veita þverfaglegan þekkingargrunn til stjórnunarstarfa í sjávarútvegi eða tengdum
greinum, ásamt því að veita breiðan grunn til frekara náms. Slík menntun er forsenda góðrar auðlindastjórnunar og skipulags og
ýtir undir sjálfbæra nýtingu auðlinda og verðmætasköpun. Mikil áhersla er lögð á samvinnu við fyrirtæki og stofnanir sem
vinna við sjávarútveg og stoðgreinar hans, m.a. í tengslum við lokaverkefni nemanda. (lesa meira)
Mikilvægi námsins
Sjávarútvegurinn er í raun ferli sem nær allt frá umhverfi auðlindarinnar, þ.e. hafinu, þar til að afurðin er komin á disk neytenda á innlendum eða alþjóðlegum mörkuðum. Sjávarútvegur er því mjög fjölbreyttur og rúmar mörg starfsvið. Íslenskur sjávarútvegur hefur verið alþjóðlegur frá 15. öld og hefur lengi verið okkar mikilvægasti atvinnuvegur. Nýjasta tækni sem oft er hönnuð og smíðuð hér á landi er notuð á flestum stigum hans þannig að óhætt er að segja að hann sé einn sá framsæknasti og tæknivæddasti í heimi. Íslenskar sjávarafurðir hafa einnig orð á sér erlendis fyrir að vera gæðavara og þess vegna seljast þær á hærra verði en vörur keppinautanna.
Til að halda þessari stöðu þarf sjávarútvegurinn að viðhalda stöðugri þróun, tækniframförum og háu menntunarstigi. Því er góð undirstöðumenntun og þjálfun þeirra sem starfa í sjávarútvegi mikilvæg. Við lítum á það sem meginmarkmið kennslu í sjávarútvegsfræðum að útskrifa hæft fólk til stjórnunarstarfa í þessum geira og viðhalda því orðspori og framsækni sem einkennir hann.
Að námi loknu
Hingað til hefur megnið af útskrifuðum sjávarútvegs-fræðingum haldið beint út í atvinnulífið, enda verið þörf á þeim þar. Um það bil helmingur þeirra endar í ýmsum stjórnunarstörfum í sjávarútvegi (smellið á kökurit hér til hliðar), en helmingur endar utan sjávarútvegsins. Flestir í einhverju tengdu fjármálum (í bönkum eða öðrum fjármálafyrirtækjum) eða rekstri fyrirtækja. Námið opnar því ýmsar dyr utan sjávarútvegsins.
