Námsumhverfi

Námsaðstaða, rannsóknaaðstaða og tækjabúnaður

Nám í auðlindafræðum er að stórum hluta til raunvísindatengt og því er aðstaða til rannsókna og verklegs náms afar mikilvægur þáttur í umhverfi jafnt nemenda sem kennara.
Með tilkomu Borga, nýja rannsóknar- og nýsköpunarhúss Háskólans, sem tekið var í notkun í október 2004, batnaði öll aðstaða til rannsókna og verklegrar kennslu til muna. Inn í rannsóknarhúsið, sem er 5,500 m2 að flatarmáli, fluttu einnig margar samstarfsstofnanir, m.a. útibú Matís og Hafrannsóknastofnunar (Hafró), en auk þess Akureyrarútibú Náttúrufræðistofnunar, Stofnun Vilhjálms Stefánssonar, Rannsóknastofnun Háskólans á Akureyri (RHA), Umhverfisstofnun og fleiri stofnanir. Samstarf þessara stofnana og annarra í rannsóknarhúsinu myndar nú sterkan þekkingargrunn (vísindagarð), og býður upp á góða aðstöðu til kennslu og rannsókna á öllum sviðum auðlindamála.

Stúdentagarðar

Félagsstofnun stúdenta á Akureyri er sjálfseignarstofnun sem Háskólinn á Akureyri, skráðir stúdentar og Akureyrarbær eiga aðild að. Þessir aðilar skipa einnig fulltrúa í stjórn Félagsstofnunar. Félagsstofnun rekur nú stúdentagarða víða á Akureyri. Sjá nánar á www.festaha.is.

Bókakostur

Bókasafn Háskólans er í nýju og rúmgóðu húsnæði á Sólborg. Það er rannsókna- og sérfræðibókasafn sem sníður kaup sín á efni að mestu leyti eftir þörfum háskóladeildanna fjögurra. Bókakostur er orðinn mjög góður og byggist á sérhæfðum bókum, tímaritum, myndböndum og ekki síst rafrænum tímaritum og gagnasöfnum . Hægt er að nálgast mikið af sérhæfðum tímaritum frítt á netinu og er mikil áhersla á að nota vefinn í verkefnavinnu í sjávarútvegsfræðum.

Rannsóknastofur

Á Borgum er að finna fullkomnar og vel tækjum búnar rannsóknastofur og sérútbúnar kennslustofur til verklegs náms á hinum ýmsu sviðum auðlindafræðanna, svo sem lífvísindum, efnafræði, eðlisfræði og jarðvísindum. Einnig er rannsóknaraðstaða við samstarfsstofnanir auðlindadeildar í Borgum, m.a. Matís, Akureyrarútibú Hafrannsóknastofnunar og Akureyrarútibú Náttúrufræðistofnunar Íslands.

Rannsóknartæki

Auk almenns rannsóknastofutækjakosts hefur Háskólinn yfir að ráða ýmsum sérhæfðum rannsóknatækjum sem nýtast við rannsókna- og þróunarvinnu sérfræðinga á auðlindasviði, en nemendur koma mjög að slíkri vinnu á síðari stigum námsins. Meðal sérhæfðra rannsóknatækja má nefna tæki til sameinda- og kerfalíffræðilegra rannsókna, svo sem DNA raðgreini (sequencer), pólýmerasakeðjuhvarfs (PCR)-tæki og tæki til tvívíðs rafdráttar (2D-PAGE) prótína, tæki til sérhæfðra efnagreininga, svo sem gasskilju (gas chromatograph), háþrýstivökvaskilju (HPLC), og röntgenflúrljómunarrófgreini (XRF). Nemendur í auðlindafræðum og upplýsingatækni njóta fyrsta flokks aðstöðu til náms, verkefnavinnslu og rannsókna. Samstarf við fyrirtæki og stofnanir tryggir þeim jafnframt aðgang að sérfræðingum á öllum fræðasviðum brautanna.

Rannsóknabáturinn Einar í Nesi

Rannsóknabáturinn Einar í Nesi EA-49 er 10 tonna rannsóknabátur af gerðinni Gáski 1000 sem útibú Hafrannsóknastofnunarinnar á Akureyri annast reksturinn á. Báturinn var keyptur notaður árið 1994 og var þá þegar farið út í talsverðar breytingar á honum til að auka notagildi hans við rannsóknir og kennslu. Breytingarnar fólust í að byggt var við stýrishúsið til að auka vinnupláss innandyra og settur var krani á bátinn. Smám saman hafa notkunarmöguleikar bátsins aukist vegna tilkomu nýrra rannsóknatækja. Einar í Nesi hefur verið notaður við ýmsar rannsóknir á vegum Hafrannsóknastofnunarinnar ásamt því sem hann hefur verið notaður til verklegrar kennslu við Háskólann á Akureyri. Einar er búinn glussakrana með spili, tveimur handfærarúllum, kafarastiga, botngreip, sjótökum, sondu, svifháf og grind ofan á stýrishúsið til hvalarannsókna.