6. nóvember 2008 kl. 16:30
Lífsleikni í grunnskólum við Eyjafjörð
Ingibjörg Jóhannsdóttir, M.Ed.
Meistaraprófsverkefni Ingibjargar ber titilinn Lífsleikni í grunnskólum við Eyjafjörð.
Með rannsókninni var hugað að inntaki námsgreinarinnar lífsleikni; á hvað forsendum hún byggir og hvaða þörfum henni er ætlað að mæta. Jafnframt var námsgreinin skoðuð í alþjóðlegu samhengi. Rannsóknin sem byggir á sýn kennara var eigindleg og sýndi m.a að námsgreinin lífsleikni hefur áunnið sér fastan sess og leitt til þess að ýmsar áherslur hafa breyst í skólastarfi. Leiðsögukennari var Kristján Kristjánsson Háskólann á Akureyri og Háskóla Íslands, ráðunautur var Kjartan Ólafsson Háskólanum á Akureyri og prófdómari var Ólafur Páll Jónsson Háskóla Íslands.
20. nóvember 2008 kl. 16:30
„Það gengur allt út á lestur og skrift.“
Líðan nemenda með leshömlun og hugmyndir þeirra um námsval og framtíðarmöguleika
Sigurbjörg Sigurgeirsdóttir, M.Ed.
Meistaraprófsverkefni Sigurbjargar ber titilinn „Það gengur allt út á lestur og skrift.“ Líðan nemenda með leshömlun og hugmyndir þeirra um námsval og framtíðarmöguleika. Í rannsókninni var rætt við nemendur með leshömlun í efri bekkjum grunnskóla til að leita svara við því hvort þeir telji að hömlunin hafi áhrif á námsval þeirra eftir að grunnskóla lýkur, hugmyndir þeirra um framtíðarmöguleika í námi og líðan þeirra í skólanum. Meginniðurstaða sýndi að nemendurnir voru óvissir um áhrif leshömlunarinnar á nám þeirra, framtíðarmöguleika og líðan, en töldu áherslu á bóklegar greinar skerða möguleika sína í námi. Leiðsögukennari var Kristín Aðalsteinsdóttir Háskólanum á Akureyri, ráðunautur var Halldóra Haraldsdóttir Háskólanum á Akureyri og prófdómari Auður B. Kristinsdóttir MEd. kennsluráðgjafi.
4. desember 2008 kl. 16:30
Hvernig lífsleikni?
Staða lífsleikni í fjórum íslenskum framhaldsskólum
Sverrir Haraldsson, M.Ed.
Meistaraprófsverkefni Sverris ber titilinn Hvernig lífsleikni? Staða lífsleikni í fjórum íslenskum
framhaldsskólum. Tilgangur rannsóknarinnar var að kanna stöðu kennslu í lífsleikni í fjórum íslenskum framhaldsskólum. Rannsóknin var eigindleg og sýndi að svo virðist sem megináhersla í kennslu í lífsleikni í þessum skólunum sé á félagsþroska- og tilfinninganám auk menntunar í þegnskap og skapgerðarmótun. Greina mátti aukinn þátt þegnskaparmenntunar sé mið tekið af tillögum að endurskoðun aðalnámskrár.
Leiðsögukennari var Guðmundur Heiðar Frímannsson Háskólanum á Akureyri, ráðunautur var Rúnar Sigþórsson Háskólanum á Akureyri og prófdómari var Erla Kristjánsdóttir Háskóla Íslands.
15. janúar 2009 kl. 16:30
„Þegar tungumálið kemur, þá kemur allt.“
Reynsla kvenna af Kosovo-albönskum uppruna af að búa á Íslandi.
Dagbjört Ásgeirsdóttir, M.Ed.
Meistaraprófsverkefni Dagbjartar ber titilinn „Þegar tungumálið kemur,þá kemur allt.“ Reynsla kvenna af Kosovo-albönskum uppruna af að búa á Íslandi. Markmið rannsóknarinnar var að auka skilning kennara, heilbrigðisstarfsmanna og annarra á reynslu kvenna af Kosovo-albönskum uppruna af að búa á Íslandi, tilfinningum þeirra, viðhorfum og aðstæðum. Rannsóknin var eigindleg og leiddi m.a. í ljós mikilvægi þess, í aðlögun innflytjenda, að þeir nái valdi á ríkjandi tungumáli. Takmörkuð íslensku- og jafnvel enskukunnátta og lítil þekking á íslenskum aðstæðum getur skapað mikla vanlíðan og kvíða hjá innflytjendum, sem síðan getur leitt til einangrunar. Leiðsögukennari var Jón Haukur Ingimundarson Stofnun Vilhjálms Stefánssonar, ráðunautur Jórunn Elídóttir Háskólanum á Akureyri og prófdómari var Hanna Ragnarsdóttir Háskóla Íslands.
29. janúar 2009 kl. 16:30
Fimm ára og fær í flestan sjó
Lestrar-, ritunar- og stærðfræðiundirbúningur í gegnum leik.
Anna Elísa Hreiðarsdóttir, lektor
Við fæðingu hefur einstaklingurinn námsferli sem stendur allt lífið. Fjölbreytt og örvandi leikskólaumhverfi og jákvæð reynsla af námi gefur börnum góðar undirstöður fyrir grunnskólagöngu þar sem lestur skipar stórann sess. Því er það mikilvægt að leikskólar vandi áherslur sínar á þessu sviði. Aðalnámskrá leikskóla (1999) leggur mikla áherslu á að börn á leikskólaaldri læri í gegnum leik og hann sé þeim mikilvæg náms- og þroskaleið. Samþætting og skörun eru einnig mikilvæg og allt eru þetta aðalatriði í aðferðafræðinni sem hér er kynnt. Verkefnið Fimm ára og fær í flestan sjó er þróunarverkefni sem unnið var á leikskólanum Iðavelli, Akureyri. Megin áhersla er lögð á leikinn sem námsleið í fjölbreyttu umhverfi sem hvetur til sjálfsnáms, náms með jafningjum og náms með kennara og verkefni eru tengd inn á sem flesta þætti daglegs starfs.
12. febrúar 2009 kl. 16:30
„Maður er bara ekki Íslendingur ef maður beygir ekki rétt“
Af áhrifum málfarslegra viðhorfa á málnotkun
Dr. Finnur Friðriksson, lektor
Í erindinu verður fjallað um hluta niðurstaðna nývarinnar doktorsritgerðar. Sjónum verður einkum beint að því hvernig málnotkun og þar með þróun málkerfa virðist um margt háð viðhorfum málnotenda varðandi eigin málfar jafnt sem annarra. Í þessu samhengi verður einnig fjallað sérstaklega um tengsl málfarslegra viðhorfa við þjóðerniskennd og málstefnu og niðurstöður rannsóknarinnar settar í samhengi við íslenskukennslu í grunnskólum.
5. mars 2009 kl. 16:30
„Mér finnst þetta spennandi, og gefur mikla möguleika“...
Aðalbjörg Ólafsdóttir, aðjunkt
Á undanförnum árum hefur orðið mikil tæknibylting í upplýsingamálum í þjóðfélaginu. Upplýsinga- og samskiptatæknin, með aukinni tölvunotkun hefur rutt sér til rúms með Interneti og gagnabönkum, leitarvefjum og margmiðlunarefni og aðgangur fólks að upplýsingum er orðinn auðveldari en áður. Þessara áhrifa gætir alls staðar í þjóðfélaginu og það blasir við, að nemendur sem koma út úr skóla þurfa að vera undir það búnir að takast á við þennan síbreytilega heim tækni, upplýsinga og samskipta. Myndlist er í eðli sínu upplýsingamiðill sem hefur í gegnum aldirnar breitt út þekkingu til allra kynslóða í heiminum og hlutverk hennar hefur í því tilliti ekki verið ólíkt því sem við upplifum í notkun upplýsingatækni í þjóðfélaginu í dag.
Notkun tölvu- og upplýsingatækni í námi og kennslu hefur víða verið rannsökuð, einkum erlendis, og þykir margt benda til þess að hún falli mjög vel að myndlist og hugmyndafræði fagmiðaðrar myndlistarkennslu, sem er sú nálgun sem aðalnámskrá grunnskóla fyrir listgreinar byggir á. Hér verður fjallað um niðurstöður rannsóknar á notkun tölvu- og upplýsingatækni í myndlistarkennslu í grunnskóla. Kennarar eru jákvæðir gagnvart notkun tækninnar í kennslu og telja mikla möguleika fólgna í notkun hennar í kennslu og námi.
27. mars 2009 kl. 16:30
Skólastjórnun og mótun skólamenningar
Ingileif Ástvaldsdóttir, skólastjóri Þelamerkurskóla.
Í rannsókn þeirri sem hér er kynnt var kastljósinu beint að því sviði skólastarfs þar sem mætast skólamenning sérhvers skóla og kröfur nútímans um annars konar stjórnunarhætti og áherslur í skólastarfi en tíðkast hafa um árabil. Á því sviði leikur skólastjórinn lykilhlutverk í að flétta saman utanaðkomandi kröfur og skólastarfið. Þess ber að geta að skólastarf í hverjum skóla byggir á menningu sem miðast við hugmyndir sem eiga sér djúpar rætur í vitund þeirra sem koma að framkvæmd starfsins. Gagna var aflað með eigindlegum rannsóknaraðferðum í þremur skólum sem allir voru á þriðja starfsári þegar gagnaöflun fór fram.
Í rannsókninni var sjónum beint sérstaklega að áhrifum skólastjórnenda á skólamenningu í nýjum skólum. Skólastjórnendur og skólamenning í nýjum skólum voru skoðaðir vegna þess að í ungri stofnun má ætla að séu á ferðinni straumar og ferli sem einkennast af lausnaleit, frumkvæði og lærdómi. Meginspurningin sem lá til grundvallar rannsókninni var: Hver eru áhrif skólastjóra á mótun skólamenningar nýrra skóla?
