Auðlindafræði er safnheiti yfir hvers kyns vísindi er lúta að sjálfbærri nýtingu náttúruauðlinda. Hér er því um að ræða þverfaglegt fræðasvið þar sem saman koma raunvísindi, náttúrufræði, hagfræði og viðskiptafræði. Auk bakkalárnáms í líftækni, sjávarútvegsfræðum og umhverfis og auðlindafræðum býður raunvísindadeild HA upp á rannsóknartengt meistaranám í auðlindafræðum þar sem nám er sniðið að einstökum nemendum og rannsóknarverkefnum.
Námsgráðan
Þeir sem ljúka rannsóknartengdu meistaranámi í auðlindafræðum hljóta lærdómstitilinn Magister Scientiarum í
auðlindafræðum (natural resource sciences). Námið veitir góðan undirbúning undir ýmis sérfræðistörf á sviðum sem
tengjast rannsóknarverkefninu, auk aðgangs að doktorsnámi á tengdum fræðasviðum við jafnt innlenda sem erlenda háskóla.
Meðal starfa að námi loknu má nefna rannsóknarstörf í líftæknifyrirtækjum, sérfræðistörf á
rannsóknarstofnunum, verkfræðistofum o.fl. auk kennslu og rannsókna í háskólum.
Uppbygging námsins
Skipulag meistaranáms í auðlindafræðum er á margan hátt ólíkt því sem gildir á bakkalárstigi. Til að mynda er
ekki fyrirliggjandi ákveðin námskrá meistaranáms, heldur er námið einstaklingsmiðað þannig að hver nemandi fylgir eigin
námskrá sem er sérsniðin að þörfum hans og þess rannsóknarverkefnis sem hann vinnur að á námstímanum. Meðal fyrstu
verkefna meistarakandídatsins er að velja sér námskeið úr kennsluskrám HA og samstarfsstofnana hans í náinni samvinnu við
aðalleiðbeinanda sinn. Meistaranámsnefnd viðskipta og raunvísindasviðs tryggir að hin einstaklingsmiðaða námskrá standist ýtrustu
gæðakröfur.
Rannsóknarverkefnið
Rannsóknarverkefnið er stærsti hluti námsins og er
ýmist 60 eða 90 ECTS einingar að umfangi. Verkefnið vinnur nemandinn undir handleiðslu eins af sérfræðingum skólans, en auk aðalleiðbeinanda eru
einnig kallaðir til einn til tveir ráðgefandi sérfræðingar, gjarnan utan skólans, sem tryggja að verkefnið standist alþjóðlegar
gæðakröfur. Verkefninu lýkur með opinni vörn og skilum meistararitgerðar sem að jafnaði er rituð á ensku.
Erlend tengsl
Að öllu jöfnu taka meistaranemar í auðlindafræðum hluta
náms síns við erlenda háskóla eða aðrar samstarfsstofnanir, gjarnan í formi náms og starfsdvalar á virtri rannsóknarstofu
á sviði nátengdu rannsóknarverkefninu. Í sumum tilvikum eru einnig tekin námskeið við erlenda háskóla. Þetta fyrirkomulag tryggir
nemendum aðgengi að hinu alþjóðlega rannsóknarsamfélagi.
|
„Ég hóf nám í líftækni eftir að hafa tekið mér nokkuð langt hlé frá skóla. Þegar ég valdi þetta nám var ég ekki alveg viss um hvað ég var að koma mér í, en núna sé ég að ég valdi rétt. Námið er mjög fjölbreytt og ekki má gleyma öllu því frábæra fólki sem ég kynntist á námsárunum. Í auðlindadeild eru stundaðar öflugar rannsóknir, oft í tengslum við atvinnulífið, sem nemendum gefst kostur á að taka þátt í, t.a.m. sem sumarstarf. Ég var einmitt svo heppin að fá að taka þátt í stóru rannsóknarverkefni sem varð til þess að ég skráði mig í framhaldsnám á sama fræðasviði. Eftir meistaranámið fékk ég vinnu á verkfræðistofu, en við upphaf námsins hvarflaði ekki að mér að ég færi að starfa á slíkum vinnustað.“ Dagný Björk Reynisdóttir |
 |
