Doktorsvörn í heilbrigðisvísindum – Karen Birna Þorvaldsdóttir

Fyrsta doktorsvörnin við Háskólann á Akureyri

Þriðjudaginn 11. október 2022 mun Karen Birna Þorvaldsdóttir verja doktorsritgerð sína í heilbrigðisvísindum við Háskólann á Akureyri. Doktorsritgerðin ber heitið Að skilja og mæla hindranir þess að leita sér hjálpar eftir áfall: Þróun á mælitæki með blönduðum aðferðum (e. Understanding and Measuring Barriers to Help-Seeking after Trauma: Survivor-Centered Mixed Methods Validation Study). Vörnin fer fram á ensku í Hátíðarsal Háskólans á Akureyri kl. 13:00 og er öllum opin.

Streymi af vörninni: Streymi

Vinsamlegast tilkynnið mætingu hér: SKRÁNING

Ritgerðin var unnin undir leiðsögn Sigríðar Halldórsdóttur, prófessors við Háskólann á Akureyri. Auk hennar voru í doktorsnefnd Denise Saint Arnault, prófessor við University of Michigan í Bandaríkjunum, Rhonda M. Johnson, prófessor við University of Alaska Anchorage í Bandaríkjunum og Sigrún Sigurðardóttir, dósent við Háskólann á Akureyri.

Andmælendur eru Stefanía Ægisdóttir, prófessor í sálfræði við Ball State University í Bandaríkjunum og Maria Wemrell, dósent í lýðheilsuvísindum við Lundarháskóla í Svíþjóð.

Guðrún Rósa Þórsteinsdóttir forstöðumaður Miðstöðvar doktorsnáms og Kristján Þór Magnússon settur forseti Heilbrigðis-, viðskipta-, og raunvísindasviðs munu stýra athöfninni.

Um doktorsefnið

Karen Birna Þorvaldsdóttir er fædd árið 1993 á Akureyri. Hún lauk stúdentsprófi frá Menntaskólanum á Akureyri árið 2013, B.A. gráðu í sálfræði frá Háskólanum á Akureyri árið 2017 og M.S. gráðu í heilbrigðisvísindum með áherslu á sálræn áföll og ofbeldi frá sama skóla árið 2019. Karen Birna hóf doktorsnám í heilbrigðisvísindum við Háskólann á Akureyri árið 2019. Hún tók hluta af doktorsnáminu við University of Michigan í Bandaríkjunum sem Fulbright styrkþegi og dvaldi þar við Michigan Mixed Methods rannsóknastofnunina. Meðfram náminu hefur Karen Birna kennt við Háskólann á Akureyri sem stundakennari, gegnt stöðu formanns Rannsóknamiðstöðvar gegn ofbeldi og setið í stjórn Bjarmahlíðar – miðstöðvar fyrir þolendur ofbeldis.

Doktorsverkefnið var styrkt af Jafnréttissjóði Íslands, Fulbright stofnuninni, Rannsóknasjóði Háskólans á Akureyri og University of Michigan Institute for Research on Women and Gender.

Ágrip

Meginmarkmið doktorsverkefnisins var að þróa íslenskt mælitæki sem metur hindranir þess að leita sér hjálpar eftir áfall. Nánar tiltekið að þýða og staðfæra Barriers to Help-Seeking for Trauma Scale (BHS-TR) og kanna próffræðilega eiginleika íslenskrar útgáfu BHS-TR. Blandaðar aðferðir voru notaðar í ferli sem fól í sér þýðingu–bakþýðingu, rýni sérfræðihóps, forprófun með ítarviðtölum, áreiðanleika- og réttmætisathugun og samþættingu eigindlegra og megindlegra gagna. Þátttakendur voru alls 154 íslenskar konur sem höfðu verið beittar ofbeldi í nánu sambandi, þar af 17 í eigindlega hlutanum og 137 í megindlega hlutanum. Heildarniðurstöður verkefnisins benda til þess að íslenska BHS-TR sé áreiðanlegt, réttmætt og áfallamiðað mælitæki. Þar að auki kom í ljós að meðal helstu hindrana sem þátttakendur upplifðu voru skömm, fjárhagsáhyggjur, vilja vernda sig frá því að endurupplifa áfallið og viðhorf tengd því að það sé veikleikamerki að leita sér hjálpar. BHS-TR mælitækið, sem er fyrsta sinnar tegundar á Íslandi, er framlag til rannsókna og þjónustu við þolendur ofbeldis og áfalla hér á landi. Það getur veitt mikilvægar upplýsingar sem hægt er að nýta til þess að takmarka hindranir og auðvelda þolendum að leita sér hjálpar.