Lögreglufræði fyrir verðandi lögreglumenn Diplóma

Er námið fyrir þig?

• Viltu stuðla að því að farið sé eftir stjórnarskrá Íslands og lögum landsins?
• Hefur þú áhuga á lögum og reglum?
• Ertu fær um að setja þig í spor annarra?
• Viltu leggja þitt af mörkum til að gera samfélagið betra?
• Getur þú haldið ró þinni þegar mikið gengur á?
• Viltu vera góð fyrirmynd?

Áherslur námsins

Markmið námsins er að þú öðlist hæfni til að sinna verkefnum lögreglu á grundvelli þekkingar og skilnings á réttargæslukerfinu.

Þú færð kennslu og þjálfun í samskiptum við ólíka hópa samfélagsins, við aðrar fagstéttir og í að takast á við siðferðileg álitamál.

Kenndar eru lögfræði, siðfræði, afbrotafræði, sálfræði og fleiri greinar sem gagnast þér í daglegum löggæslustörfum. Einnig lærir þú gagnreyndar aðferðir og tækni sem lögreglan beitir.

Þú getur skoðað skipulag námsins í Uglu, kennsluvef háskólans.

Starfsnám

Mennta- og starfsþróunarsetur lögreglu (MSL) annast og skipuleggur verklega hluta námsins í samstarfi við HA. Áhersla er lögð á lögreglutengda þjálfun og raunhæf verkefni. Starfsnámið er forsenda þess að fá starfsréttindi sem lögreglumaður.

Starfsnámið er kennt í lotum og fer að mestu fram í húsnæði MSL í Reykjavík. Starfsnámið hefst á haustmisseri 1. árs og byrjar 1. mánudag í september ár hvert.

Á fjórða og síðasta misseri fara stúdentar í vettvangsþjálfun hjá lögregluembættum landsins. Stúdentar velja sér lögregluembætti og er reynt að verða við þeim óskum. Þar eru stúdentar undir handleiðslu reyndra lögreglumanna sem stýra stúdentum við almenn lögreglustörf. Stúdentar fá einnig innsýn í störf rannsóknarlögreglu ásamt fleiri þáttum lögreglustarfsins. Handleiðarar lögreglu gefa að lokum umsögn sem vegur þungt í heildstæðu mati á frammistöðu stúdentsins í öllu starfsnáminu.

Nánar um starfsnámið á vef MSL.

Möguleikar að námi loknu

Þau sem ljúka diplómaprófi í lögreglufræði fyrir verðandi lögreglumenn öðlast starfsréttindi sem lögreglumenn.

Stúdentar sem lokið hafa diplómaprófi í lögreglufræði fyrir verðandi lögreglumenn geta bætt við sig 60 ECTS einingum til BA-prófs í lögreglu- og löggæslufræði.

Félagslífið

Félagslíf er mikilvægur þáttur háskólanáms og er félagslíf stúdenta við HA öflugt.

Allir stúdentar við háskólann eru í Stúdentafélagi Háskólans á Akureyri (SHA) en einnig er hver deild með sitt stúdentafélag. Kumpáni er félag lögreglufræðinema og þú getur nálgast nánari upplýsingar um félagið á Facebook.

Inntökuskilyrði

Almenn krafa er að umsækjandi hafi lokið stúdentsprófi, lokaprófi frá framhaldsskóla á þriðja hæfniþrepi, sambærilegu prófi eða að lágmarki 60 ECTS einingum frá viðurkenndum háskóla. Inntaka í námið er jafnframt háð inntöku í starfsnám á vegum Mennta- og starfsþróunarseturs lögreglu (MSL) í samvinnu við HA.

Inntökuskilyrði í starfsnám

Mennta- og starfsþróunarsetur lögreglu (MSL) annast starfsnám fyrir verðandi lögreglumenn og leggur mat á hæfni umsækjenda um starfsnám í samstarfi við HA.

Ákvörðun MSL um mat á hæfni umsækjanda um starfsnám er endanleg.

Í lögreglulögum nr. 90/1996 og reglugerð nr. 221/2017 eru inntökuskilyrði í starfsnám lögreglu tilgreind. Umsækjendur skulu fullnægja eftirtöldum almennu skilyrðum:

1. 1. vera íslenskir ríkisborgarar, 19 ára á inntökuári eða eldri,
   2. hafa ekki gerst brotlegir við refsilög, þetta gildir þó ekki ef brot er smávægilegt eða langt er um liðið frá því að það var framið, né hafa sýnt af sér háttsemi sem getur rýrt það traust sem lögreglumenn verða almennt að njóta,
   3. vera andlega og líkamlega heilbrigðir og standast læknisskoðun trúnaðarlæknis samkvæmt fyrirliggjandi kröfum sem mennta- og starfsþróunarsetur lögreglu setur reglur um í samstarfi við háskóla,
   4. hafa lokið stúdentsprófi eða annarri sambærilegri menntun,
   5. samkvæmt nánari kröfum sem ráðherra setur með reglugerð, á grundvelli tillagna frá mennta- og starfsþróunarsetri lögreglu, m.a. um menntun, starfsþjálfun, tungumálakunnáttu og líkamlega færni.
   6. hafa gild ökuréttindi.

Umsækjendur sem staðist hafa skilyrði a, b, d og f gangast undir þrekpróf og sálfræðimat, auk þess sem þeir þurfa að leysa önnur verkefni.

Þeir umsækjendur sem standast öll almennu skilyrðin eru boðaðir í viðtal og önnur verkefni.

Ákvörðun um hvaða umsækjendum er veitt innganga í starfsnám byggist á heildarmati. Hliðsjón er meðal annars höfð af eftirfarandi gögnum:

• Þrekprófi
• Sálfræðimati
• Mati læknis
• Fram­komu
• Hæfni í mannlegum samskiptum
• Sakavottorði og sakaferli að öðru leyti
• Frammistöðu í viðtali
• Öðrum verkefnum

Nánar um val á starfsnámsnemum á vef MSL.

Undanþágur

Umsækjendur sem uppfylla ekki almennar aðgangskröfur háskólans en náð hafa 25 ára aldri og lokið að lágmarki 90 einingum (140 fein) af framhaldsskólastigi verða eingöngu teknir til skoðunar ef fjöldi umsókna þeirra sem uppfylla almennar aðgangskröfur eru undir fjöldaviðmiðum. Allar undanþáguumsóknir fara til viðkomandi háskóladeildar til meðferðar. Undanþága frá inntökuskilyrðum veitir einungis leyfi til nýskrásetningar í það nám sem umsækjandi sótti um og á því háskólaári.

Sveigjanlegt nám

Allt grunnnám við Háskólann á Akureyri er sveigjanlegt nám sem þýðir að þú getur stundað námið að mestu óháð staðsetningu. Allir fylgja sömu námskrá og námskröfur eru þær sömu.

Flestir hefðbundnir fyrirlestrar eru teknir upp og settir á kennsluvef. Þannig getur þú horft á fyrirlestra þegar þér hentar og eins oft og þú vilt. Þú getur jafnvel hægt eða hraðað á hljóðinu. Í einhverjum námskeiðum getur þó verið gerð krafa um að stúdentar mæti rafrænt í rauntíma. Okkur þykir samt auðvitað skemmtilegt að sjá þig í kennslustund.

Á námstímanum þurfa allir stúdentar að koma í stuttar kennslulotur, þar sem megináhersla er lögð á verkefnavinnu og umræður. Þar gefst þér tækifæri til að hitta kennara, samnemendur og tengjast enn betur háskólasamfélaginu þínu.

Skyldumæting er í námslotur hvort heldur sem er í bóknámi við HA eða starfsnámi hjá MSL. Kynntu þér því vel dagsetningar námslotna sem birtar eru með góðum fyrirvara.

• Hér getur þú séð drög að því hvenær námslotur eru

Vinsamlega athugið að hver vika í fullu háskólanámi er ígildi 50-60 stunda vinnuviku. Fyrir vikið er ekki mælst til þess að stúdentar stundi fullt nám samhliða fullri vinnu.

• Hér getur þú lesið meira um sveigjanlega námið

Spurt og svarað