Ekki innritað skólaárið 2024-2025

Viðbótarnám í menntunarfræði er ætlað þeim sem vilja afla sér kennsluréttinda með sérþekkingu á framhaldsskólastigi.

Er námið fyrir þig?

Hefur þú áhuga á að verða kennari?
Hefur þú áhuga á uppeldis- og skólamálum?
Hefur þú gaman af ólíkum viðfangsefnum?
Finnst þér gaman að miðla af þekkingu þinni?
Vilt þú gefa af þér?
Hefur þú lokið meistara- eða doktorsprófi á einhverju námssviði framhaldsskólans og vilt afla þér kennsluréttinda á því sviði?

Áherslur námsins

Markmið námsins er að mennta fólk til starfa í menntakerfinu ásamt því að auka hæfni þess til að stunda frekara nám. Áhersla er á verklega þjálfun með vettvangsnámi og æfingakennslu.

Þú getur skoðað skipulag námsins á Uglu, kennsluvef háskólans.

Fyrirkomulag námsins

Námið er samtals 60 ECTS einingar. Gert er ráð fyrir vettvangsnámi og æfingakennslu að vori en stúdentar mega taka það að hausti ef þeir kjósa það frekar. Val er um námskeið upp að 10 ECTS einingum.

Kennsla fer fram í staðbundnum námslotum á Akureyri og er skyldumæting í þær. Jafnframt eru margvíslegir möguleikar notaðir við miðlun efnis og til gagnvirkra samskipta. Mætingarskylda er í allt vettvangsnám og æfingakennslu.

Möguleikar að námi loknu

Að loknu námi geta þau sem lokið hafa grunn- og meistaranámi sótt um leyfisbréf í samræmi við lög um menntun, hæfni og ráðningu kennara og skólastjórnenda við leikskóla, grunnskóla og framhaldsskóla nr. 95/2019.

Hæfni í íslensku

Samkvæmt reglugerð um hæfniramma með viðmiðum fyrir almenna og sérhæfða hæfni kennara og skólastjórnenda við leik-, grunn- og framhaldsskóla skal kennari við brautskráningu úr kennaranámi við íslenska háskóla búa yfir hæfni í íslensku sem samsvarar að lágmarki C1 í Evrópska tungumálarammanum.

Því eru þau sem ekki hafa íslensku sem fyrsta mál og sækja um grunn- eða framhaldsnám við Kennaradeild beðin um að meta færni sína í íslensku og fylla út sjálfsmatsramma Evrópuráðsins.

Hér má sjá Tungumálaramma Evrópuráðsins.

Námskeið við Kennaradeild eru almennt kennd á íslensku.

Inntökuskilyrði

Meistarapróf eða sambærilegt próf með 2. einkunn.

Hér getur þú lesið meira um inntökuskilyrði háskólans.

Námsstyrkur

Þau sem ljúka námi frá með vorönn 2021 í 60 ECTS viðbótarnámi til kennsluréttinda í framhaldsskóla geta fengið helming styrksins, 400.000 kr. sem greiðist út í einu lagi við námslok.

Nánar um námsstyrk.

Umsagnir

Kennsluréttindin eru einkar góð viðbót fyrir sjálfstætt starfandi listamann eins og mig, enda opna þau á möguleika til þess að miðla, sem maður hefði annars ekki. Þar að auki veitir það manni svo mikinn innblástur að kenna og kynnast skemmtilegu fólki

Vilhjálmur B. Bragason

skáld og skemmtikraftur

Skipulag náms

1. ár

Haust
Læsi til skilnings
Nemandinn í skóla margbreytileikans
Námskráin: Náms- og kennsluaðferðir
Námskenningar, nemendur og kennsla
Vor
Starfsþróun kennara, forysta og bekkjarstjórnun
Vettvangsnám og æfingakennsla
Val - Heimspeki menntunar

Læsi til skilnings

Í námskeiðinu er fjallað um tengsl máls, lesturs og náms og gildi læsis fyrir samfélagið og einstaklinginn í samfélaginu. Lögð verður áhersla á að nemendur læri hagnýtar aðferðir til að efla orðaforða, skilning, textaúrvinnslu og námsvitund. Einnig verður lögð áhersla á hlutverk frásagnar og ritunar í þróun læsis og skoðuð tengsl þátta eins og lesturs, hlustunar, máls og ritunar. Fjallað verður um málið í samfélaginu og margs konar læsi er varðar t.d. tákn, myndir og menningu. Umfjöllun í námskeiðinu verður tengd námskrám og kennsluáætlunum í grunn- og framhaldsskóla.

Nánar um námskeiðið

Nemandinn í skóla margbreytileikans

Í námskeiðinu verður fjallað um breytingar á íslensku samfélagi með hliðsjón af alheimsvæðingu og fólksflutningum og hvaða áhrif slíkar breytingar hafa á skólastarf og nám nemenda. Fjallað verður um fjölmenningu, lýðræði og skóla án aðgreiningar í fræðilegu samhengi og hvernig þessar hugmyndir birtast í íslenskri menntastefnu, lögum, námskrám og daglegu starfi skóla. Veitt verður innsýn í margbreytileika skóla og samfélags og stöðu ýmissa jaðarhópa í skólasamfélaginu. Áhersla verður lögð á margþættan og ólíkan stuðning nemenda til náms og hvernig kennari getur komið til móts við fjölbreyttan nemendahóp með sveigjanlegu skipulagi og fjölbreyttum kennsluaðferðum. Í því sambandi verður rætt um gildi samstarfs við foreldra og fagfólk. Lögð er áhersla á kennslufræði fjölmenningar og skóla án aðgreiningar og að nemendur geti skipulagt, kennt og metið nám og kennslu í fjölbreyttum nemendahópum. Nemendur þjálfast í gerð námsáætlana fyrir einstaka nemendur. Rík áhersla verður lögð á ígrundun nemenda út frá eigin viðhorfum og fræðilegum hugtökum og efnistökum námskeiðsins.

Nánar um námskeiðið

Námskráin: Náms- og kennsluaðferðir

Námskeiðið miðar að því að efla hæfni í að nýta þekkingu í námskrár- og kennslufræðum markvisst í áætlanagerð fyrir nám og kennslu. Sjónum er beint að áherslum í gildandi aðalnámskrám fyrir grunn- og framhaldsskólastigið, sem og að skólanámskrám, eðli þeirra og tilgangi. Fjallað er um þátttöku og hlutverk kennara í námskrárgerð og námskrárþróun. Í námskeiðinu fá nemendur innsýn í náms- og kennsluaðferðir sem geta komið til móts við mismunandi þarfir nemenda. Rætt verður um mikilvægi þess að setja skýr markmið og viðmið um árangur og að veita endurgjöf í samræmi við þau. Þá verður fjallað um mismunandi hlutverk námsmats og lögð áhersla á fjölbreytt mat. Nemendur fá þjálfun í að gera kennsluáætlanir sem miða að því að ná markmiðum aðalnámskrár grunn- og framhaldsskóla og meta árangur.

Nánar um námskeiðið

Námskenningar, nemendur og kennsla

Í námskeiðinu er sjónum beint að meginviðfangsefnum námssálfræðinnar sem lúta að nemendum á leik-, grunn- og framhaldsskólastigi, námskenningum, námsumhverfi og tengslum við nám og kennslu. Fjallað er um fræðilegar meginstoðir sem lúta að (a) nemendum, t.d. þvi sem aðgreinir nemendur, (b) námskenningum og tengslum þeirra við námskrár, kennsluaðferðir og námsmat, (c) innra og ytra námsumhverfi og hvernig það mótar forsendur náms, s.s. áhugahvöt, sjálfskenningar, væntingar og skuldbindingu nemenda.

Nánar um námskeiðið

Starfsþróun kennara, forysta og bekkjarstjórnun

Meginviðfangsefni námskeiðsins lúta að starfsþróun kennara og þróun skólastarfs. Fjallað er um gildi lærdómssamfélags fyrir skólastarf og þær forsendur sem þurfa að vera fyrir hendi til að stuðla að myndun þess. Í því sambandi er sjónum m.a. beint að breytingastarfi, sjálfsmati skóla, teymisvinnu, starfsþróun og fagmennsku kennara og leiðum til að efla forystu þeirra. Í námskeiðinu verður veitt innsýn í bekkjarstjórnun og agastefnur skóla og fjallað um þátt kennarans í að festa þær í sessi. Í því sambandi verður sjónum m.a. beint að einelti og leiðum til að fyrirbyggja og bregðast við því. Nemendur læra einnig um mikilvægi samstarfs kennara við foreldra og aðra sem tengjast námi og velferð barna og barnavernd.

Nánar um námskeiðið

Vettvangsnám og æfingakennsla

Í námskeiðinu fær nemandinn tækifæri til þess að tengja fræðilegan grunn úr kennaranámi við raunverulegt skólastarf. Kennaranemi vinnur undir handleiðslu og leiðsögn leiðsögukennara þann tíma sem hann dvelur í skólanum og vinnur að vettvangsathugunum og kennir ákveðinn fjölda kennslustunda undir leiðsögn. Nemandi fær leiðsögn um val kennsluaðferða og námsefnis. Hann fær leiðsögn við gerð kennsluáætlana og endurgjöf á framkvæmd kennslunnar og þjálfun við ígrundun eigin frammistöðu.

Nánar um námskeiðið

Heimspeki menntunar

Farið er yfir grundvallaratriði í menntun á borð við kennslu, nám og stöðu kennara. Námskrá, markmið náms, sálarlíf, menning, tunga, þekking, skilningur og námsmat eru athuguð. Menntun og skólar eru tengd við samfélag, hugmyndir um jöfnuð, réttlæti, frelsi, kennivald og aga.

Nánar um námskeiðið