Viðskiptafræði við Háskólann á Akureyri veitir þér sterkan grunn í rekstri, stefnumótun og fjármálum. Námið undirbýr þig fyrir ábyrgðarstöður í fyrirtækjum og fjármálastofnunum.
Sérstaða námsins felst í sveigjanlegu fyrirkomulagi og nánu sambandi við atvinnulífið. Þú getur stundað námið óháð stað og stund.
Í viðskiptafræði getur þú lagt áherslu á:
Áherslulínan stjórnun og fjármál undirbýr þig fyrir stjórnunarstöður og ábyrgðarhlutverk í fjármálafyrirtækjum. Námið veitir jafnframt góðan grunn fyrir framhaldsnám í viðskiptafræði.
Í náminu leggur þú áherslu á:
Þú vinnur bæði einstaklings- og hópverkefni, oft í samstarfi við fyrirtæki og stofnanir. Námið eflir gagnrýna hugsun, greiningarhæfni og sjálfstæð vinnubrögð.
Þú getur skoðað skipulag námsins í Uglu, kennsluvef háskólans.
Grunnnám við HA er sveigjanlegt nám og allir fylgja sömu námskrá og sömu kröfum.
Flestir fyrirlestrar eru teknir upp og aðgengilegir á kennsluvef, þannig að þú getur horft á þá þegar þér hentar. Einnig er hægt að taka þátt í umræðum og verkefnavinnu á kennsluvef.
Um miðbik hvers misseris er námslota á Akureyri þar sem gert er ráð fyrir mætingu en þó er ekki skyldumæting. Þar er lögð áhersla á verkefnavinnu og umræður og gefst tækifæri til að hitta kennara og samnemendur og tengjast enn betur háskólasamfélaginu þínu.
Athugið að fullt háskólanám jafngildir að jafnaði 50–60 stunda vinnuviku.
Hér getur þú lesið meira um sveigjanlega námið og séð hvenær námslotur eru.
Viðskiptafræði opnar margar dyr.
Brautskráðir nemendur starfa meðal annars hjá fyrirtækjum, bönkum, tryggingafélögum, félagasamtökum og opinberum stofnunum sem:
Námið er einnig góður grunnur fyrir framhaldsnám hérlendis og erlendis.
Með því að bæta við einu námsári getur þú útskrifast bæði í viðskiptafræði og sjávarútvegsfræði.
Félagslíf er mikilvægur þáttur háskólanáms og er félagslíf nemenda við HA öflugt.
Allir nemendur við háskólann eru í Stúdentafélagi Háskólans á Akureyri (SHA) en einnig er hver deild með sitt nemendafélag. Reki er félag viðskiptafræðinema og þú getur nálgast nánari upplýsingar um félagið á Facebook.
Almenn krafa er að umsækjendur hafi lokið stúdentsprófi, lokaprófi frá framhaldsskóla á þriðja hæfniþrepi, jafngildu erlendu prófi eða 60 ECTS einingum frá viðurkenndum háskóla.
Undanþágur
Umsækjendur án stúdentsprófs sem hafa lokið að lágmarki 153 einingum á framhaldsskólastigi og hafa náð 25 ára aldri koma aðeins til skoðunar ef námspláss leyfir. Þá er einnig horft til námseininga og starfsreynslu.
Allir nemendur eiga kost á að taka hluta af námi sínu við erlenda samstarfsháskóla.
Þú færð niðurfellingu á skólagjöldum gestaskólans og greiðir eingöngu innritunargjald í HA. Alþjóðafulltrúi aðstoðar þig við að sækja um námið, húsnæði og nemendastyrk.
Viðskiptafræðin við HA er fjölbreytt, skemmtileg og vel skipulögð. Námið undirbjó mig mjög vel undir krefjandi farmahaldsnám í fjármálum fyrirtækja við Háskólann í Edinborg. Einnig reyndist sú þekking sem ég öðlaðist við HA vera mjög gagnleg sem undirbúningur fyrir störf mín á fjármálamarkaði.
Háskólinn á Akureyri bjó mig vel undir krefjandi framhaldsnám erlendis, í University of Edinburgh Business School. Stærð HA auðveldar samskipti við kennara verulega án þess að koma niður á yfirgripsmiklu námsframboði.
Námið við Háskólann á Akureyri er metnaðarfullt og einstaklingsmiðað. Stærð skólans og skipulag námsins skapar möguleika á persónulegri samskiptum og aðstoð frá kennurum en gengur og gerist. Námið er vel uppbyggt og fjölbreytt, nemendahópurinn þéttur og verkefnavinnan krefjandi. Námið undirbjó mig vel fyrir vinnumarkaðinn.
Í námskeiðinu er fjallað um stjórnun og stjórnunarkenningar, skipulagsheildir og atferli einstaklinga og hópa við vinnu. Fjallað er um staðblæ og gildismat innan fyrirtækja og sérstök áhersla lögð á mismunandi þjóðmenningu, viðskiptasiðferði og samfélagslega ábyrgð. Ennfremur er fjallað um atferli einstaklinga og vinnuhópa, starfshvatningu, stjórnunarstíla, leiðtogahlutverkið og breytingastjórnun. Loks er fjallað um nýjar áherslur í stjórnun.
Í námskeiðinu er lögð áhersla á að kenna grundvallaraðferðir, hugtök og vinnubrögð sem nýtast við stærðfræðilegar lausnir á vandamálum sem koma fyrir í viðskiptafræði.
Námskeiðið miðar að því að þjálfa nemendur í helstu grundvallaratriðum fræðilegra vinnubragða. Í námskeiðinu er fjallað um helstu gerðir rannsókna og markmið þeirra, hin tvö megin rannsóknar-viðmið rannsókna, þ.e. vísindaheimspekilegar forsendur þeirra. Kynntar eru helstu rannsóknar-aðferðir og er lögð áhersla á að megindlegar og eigindlegar aðferðir séu kynntar sérstaklega. Þá er lögð áhersla á skipulag rannsókna, rannsóknarspurningar, skilgreiningar hugtaka og tilgátur. Heimildavinna, rafræn heimildaleit, tilvísanir í heimildir og heimildaskráning fá vandlega umfjöllun . Fjallað er um úrvinnslu gagna og framsetningu niðurstaðna gagna, m.a. gerð texta, stílbrigði,og grunnatriði framsetningar tölfræðilegra gagna. Þá er fjallað sérstaklega um siðferðileg álitamál í rannsóknum og gagnrýna hugsun í vísindum. Loks er lögð mikil áhersla á að kenna nemendum ritgerðasmíð, uppbyggingu ritgerða og skýrslna og verklag við slíka vinnu. Áhersla er lögð á vinnu minni nemendahópa að sértæku rannsóknarverkefni sem gefur nemendum innsýn og þjálfun í ferli rannsóknar: undirbúning, framkvæmd og framsetningu niðurstaðna.
Tilgangur námskeiðsins er að kynna nemendum tengsl upplýsingakerfis, bókhalds og reikningsskila. Horft er til laga og reglugerða um bókhald og uppsetningu ársreikninga. Farið er yfir settar reikningsskilareglur og siðferðislega matsþætti við færslu og vinnslu bókhalds. Grundvallaratriði tvíhliða bókhalds og færslu virðisaukaskatts. Bókunarferillinn er rakinn, bókunarfærslur eru gerðar og lokauppgjör unnin. Uppsetningu og samspili efnahags-, rekstrarreiknings og sjóðstreymis eru gerð ítarleg skil. Færslur í tölvubókhaldi eru einnig skoðaðar.
Þjóðhagfræði og þjóðhagsreikningar. Þjóðartekjur neysla, fjárfesting, sparnaður, skattar og opinber útgjöld, útflutningur, innflutningur og margföldunaráhrif. Framleiðslan og heildareftirspurn. Peningar og lánastofnanir. Seðlabanki, framboð og eftirspurn eftir peningum. Heildarframboð, verðlag og hraði aðlögunar. Verðbólgukenningar, væntingar og trúverðugleiki. Vinnumarkaður og atvinnuleysi. Gengi og viðskiptajöfnuður. Hagstjórn í opnu hagkerfi. Hagvöxtur og hagvaxtarkenningar. Hagsveiflur. Staða þjóðhagfræðinnar í dag. Hlutfallslegir yfirburðir, milliríkjaverslun og viðskiptastefna. Fyrirkomulag gengismála, samþætting í Evrópu og þróunarríki. Einkenni og þróun íslenska hagkerfisins og sérkenni núverandi „sjávarútvegshagkerfis“. Kennsla fer fram í fyrirlestrum og verkefnavinnu og /eða prófæfingum.
Tilgangur námskeiðsins er að veita nemandanum skilning á ársreikningum, framsetningu þeirra og almennt viðteknum reikningsskilareglum. Áhersla lögð á framlagningu ársreikninga og samspil efnahagsreiknings, rekstrarreiknings og sjóðstreymi. Einnig er fjallað um eftirfarandi efni: Lög um ársreikninga og hlutverk og ábyrgð forstjóra og endurskoðenda. Farið í aðferðafræði við lestur og greiningu ársreikninga og útreikning og túlkun á helstu kennitölum í rekstri fyrirtækja.
Fjallað er um rannsóknarsnið, helstu gagnaöflunaraðferðir og tölfræði. Af eigindlegum og megindlegum aðferðum er fjallað um viðtöl, rýnihópa og þátttökuathuganir, tilraunir, spurningakannanir og notkun opinberra gagna í rannsóknum. Þá eru kenndir helstu þættir í lýsandi tölfræði, myndrænni framsetningu gagna og einfaldri framsetningu á niðurstöðum. Kynnt eru grunnatriði í ályktunartölfræði, líkindareikningi og einföld tölfræðipróf. Einnig er farið í grunnatriði aðhvarfsgreiningar. Kynnt er skráning gagna í gagnagrunna og grunnatriði í notkun tölfræðiforrita.
Hagfræðin skilgreind og skýrð sögulega. Vísindi og vísindaleg aðferð. Staða hagfræði meðal vísindagreina. Skipting hagfræðinnar í undirgreinar. Aðferðir og tæki hagfræðinnar. Markmið með stofnun og rekstri fyrirtækja, skipulag þeirra og fjármögnun. Eftirspurn, eftirspurnarfallið, verð-, tekju- og víxlteygni, samkeppnis- og staðkvæmdarvörur. Kenningar um val neytandans. Framboð, framboðsfallið. Framleiðsla og val framleiðsluaðferða. Kostnaður, kostnaðarfallið, meðalkostnaður, jaðarkostnaður, fórnarkostnaður og hagkvæmni. Markaðsaðgerðir: fullkomlega frjáls samkeppni, ófullkomin samkeppni og hrein einokun. Verð, verðlagning og verðmismunun. Fjármagnsmarkaðurinn, vextir og fjárfestingar. Vinnumarkaðurinn, launþegafélög og mismunun. Óvissa, kraðak, og ósamhverfar upplýsingar. Almennt jafnvægi og velferðarhagfræði. Kennsla fer fram í fyrirlestrum og verkefnavinnu og /eða prófæfingum.
Markmið: Að kynna fyrir nemendum tengsl stjórnunar við rekstur og afkomu fyrirtækja og gera þeim mögulegt að nota aðferðir rekstrarstjórnunar við ákvarðanatöku. Efni: Rekstrarstjórnun. Samkeppnisstaða, stefnumótun og framleiðni. Gerð spálíkana. Skipulag afkastagetu. Rekstrarferli. Skipulag aðstöðu. Staðarval. Vörustjórnun. Birgðastýring, óháðar vörur. Gerð framleiðsluáætlana. Birgðastýring, háðar vörur. Vörustjórnun. Verkefnastjórnun.
Fjármálastjórn og viðfangsefni fjármálafræða. Kynning á fjármagnsmarkaðinum, fjármálastofnunum, vöxtum og vaxtamyndun. Samband áhættu og arðsemi. Núvirði og framvirði greiðslu og greiðslugeta. Aðferðir við mat á markaðsvirði verðbréfa. Fjármagnskostnaður. Fjárfestingaáætlanir og aðferðir við mat fjárfestinga. Sjóðstreymi og fjárfestingar. Val fjárfestinga, áhættugreining og fjármagnsskömmtun. Fjármagnsskipan fyrirtækja. Gerð fjárhagsáætlana, rekstraráætlana og um þróun fjárhagslegrar stöðu. Fjallað verður um veltufjármuni og fjármögnum þeirra. Kennsla fer fram í fyrirlestrum og verkefnavinnu og /eða prófæfingum.
Í námskeiðinu verður farið yfir notkun tölfræðilegra aðferða sem tengjast viðskiptafræði. Farið verður í líkindafræði og líkindaföll. Annað sem farið verður yfir er: tilgátuprófun, fylgni, aðhvarfsgreiningu, margvíða aðhvarfsgreiningu, tímaraðagreining og spálíkön, stikalaus próf, gæði mats, dreifigreining og úrtaksfræði. Lögð er áhersla á að nemendur verði vel undirbúnir fyrir notkun tölfræðilegra aðferða í öðrum námskeiðum og starfi. Áhersla er lögð á að nemendur noti Excel í útreikningum.
Farið verður yfir hvaðan réttarreglur eru upprunnar og helstu atriði sem varða skýringu þeirra. Þá verður yfirlit yfir grundvallaratriði í íslenskri stjórnskipun, starfsemi löggjafarvalds, framkvæmdavalds og dómstóla. Megináherslan verður þó á fjármunarétt, þ.e. réttarreglur um samninga, kaup, grundvallaratriði í kröfurétti og um skaðabætur. Kynnt verða réttarsvið sem varða viðskiptalífið sérstaklega, svo sem reglur um félög, samkeppni og fleira.
Farið yfir meginreglur laga um skattskyldu og skattlagningu tekna og eigna einstaklinga og lögaðila. Almenn skattskil, samskipti við skattyfirvöld, staðgreiðsla, rekstrarkostnaður, skattframtal, bókhaldsskylda, tekjuskráning og helstu atriði er lúta að virðisaukaskatti. Fjallað í stuttu máli um stofnun fyrirtækja og farið yfir mismunandi form framtala og skýrslugjafa eftir því hvert rekstrarformið er. Heimildir og skilyrði laga til að lágmarka skattstofna fyrir álagningu gjalda.
Kynning á eðli og hegðan kostnaðar. Samband kostnaðar, magns og hagnaðar. Kostunaraðferðir: Ferliskostun, verkkostun og verkgrunduð kostun. Áætlanir og ábyrgðarreikningar. Notkun frávikagreiningar við stjórneftirlit. Birgðakostun og afkastagreining. Viðeigandi upplýsingar. Arðsemi viðskiptavina, greining sölufrávika og sam- og hjáframleiðsla.
Í námskeiðinu er lögð áhersla á að þjálfa frekari aðferðir, hugtök og vinnubrögð í stærðfræði sem nýtast í raunvísindum og viðskiptafræði.
Mannauðsstjórnun. Þróun mannauðs- og starfsmannastjórnunar. Hlutverk starfsmannadeilda, starfsmannastefna og starfsmannaáætlanir. Greining starfa og starfahönnun. Ráðning starfsmanna, móttaka nýliða, þjálfun og fræðsla. Frammistöðumat, starfsmanna- og agaviðtöl. Launakerfi. Starfslok og vinnuréttur. Starfsánægja. Jöfn tækifæri kynja á vinnumarkaði. Alþjóðleg mannauðsstjórnun.
Farið er yfir arðgreiðslur og helstu kenningar varðandi þær, einnig fjallað um helstu gerðir hlutabréfa og breytanleg skuldabréf. Farið er yfir sjóðstreymismódelið og mat á virði fyrirtækja út frá núvirðingu á sjóðstreymi. Einnig er kennt samval verðbréfa og helstu kenningar sem þar gilda. Fjallað um samband áhættu og ávöxtunar. Farið er yfir verðmyndun skuldabréfa og vaxta, meðallíftíma skuldabréfa og áhrif vaxtabreytinga á verð skuldabréfa. Farið er yfir helstu kenningar um stjórnun verðbréfasafna. Auk þess er farið yfir íslenska fjármagnsmarkaðinn og helstu einkenni hans.
Mikilvægi alþjóðaviðskipta og hnattvæðing. Umhverfi alþjóðaviðskipta, menning, stjórnmála- og lagaumhverfi. Fræðilegur grundvöllur alþjóðaviðskipta og fjárfestinga. Fjármálamarkaðir, efnahagssamruni og nýmarkaðir. Stefnumótun í alþjóðaviðskiptum. Innganga og útvíkkun. Rekstrartengdir þættir alþjóðaviðskipta. Framtíð alþjóðaviðskipta og starfstækifæri á sviði alþjóðaviðskipta. Ofangreindir þættir verða skoðaðir í samhengi við íslenskar aðstæður og atvinnulíf, og með sérstakri áherslu á alþjóðavæðingu íslenskra fyrirtækja.
Tilgangur, uppbygging og heildarferli áætlanagerðar og tengslin við stjórneftirlit og innleiðingu stefnumótunar. Fjallað er um eðli stjórneftirlitskerfa og tengsl stefnumótunar, áætlanagerðar, ábyrgðarstaða og frammistöðumats. Kynntar eru ýmsar aðferðir við áætlanagerð m.a. við fjárhagsáætlanir, rekstraráætlanir og greiðsluáætlanir og fjallað um kosti þeirra og galla. Við kynningu á hinum ýmsu undiráætlunum er tekið mið af því sem nemendur hafa þegar kynnst í rekstrarstjórnun, fjármálum og reikningshaldi. Hluti námsins fer fram með greiningum og lausnum nemendahópa á hermidæmum (cases).
Í námskeiðinu er getið um helstu atriði skipulagsfræða. Fjallað er um stjórnskipulag fyrirtækja og stofnana og umhverfi þeirra. Gerð er grein fyrir skipulagi framleiðslu- og þjónustufyrirtækja og lífskeiði fyrirtækja. Farið verður í ákvarðanatöku í skipulagsheildum og vald og samskipti deilda og hópa innan skipulagsheilda. Gerð er grein fyrir þekkingar- og umbreytingarstjórnun, áhrifum upplýsingatækni á skipulag, alþjóðavæðingu fyrirtækja og fyrirtækjamenningu.
Vextir, áhætta og eignasöfn. Fjallað er um helstu verðmyndunarlíkön og kenningar um verðmat verðbréfa. Helstu tegundir afleiðusamninga: Vilnanir og framvirkir samningar. Fjallað verður um kenningar um samband milli núgengis, framvirks gengis, vaxta og verðbólgu. Einnig um gengisáhættu og varnir gegn henni.
Námskeiðið fjallar um það hvernig aðferðir aðgerðarannsókna og ákvarðanatöku, sem og nálganir með gervigreind, nýtast til að styðja við greiningu og ákvarðanatöku í rekstri og fjármálum.
Áhersla er lögð á bestun, hermun, spálíkön og greiningu á rekstrartengdu viðfangsefnum, þar sem nemendur læra að beita greiningartólum (þ.m.t. gervigreind) til að leysa og túlka raunhæf verkefni.
Námskeiðið sameinar fræðilegan skilning og verklega nálgun, og styður við gagnrýna, siðferðislega og gagnadrifna ákvarðanatöku í viðskiptaumhverfi.
Grunnatriði stefnumótunarfræðanna. Námskeiðið er byggt upp þannig að nemendur fái innsýn í hugtakið stefnumótun og tengi saman fræði og hagnýta notkun þeirra. Efni: Saga og hlutverk stefnumótunar. Greining ytra umhverfis. Mat á innri auðlindum. Framtíðarsýn og hlutverk, samkeppnisyfirburðir og kjarnahæfni. Valkostir og mótun stefnu. Innleiðing stefnu, skipulag, stjórnunarhættir og hagsmunaaðilar. Mótun og framkvæmd stefnu. Rýni stefnumótunar. Kennsla og verkefni: Kennsla byggist á fyrirlestrum, umræðum og verkefnum ásamt gestafyrirlestrum. Vinnuhópar starfa saman yfir önnina að fjölbreyttum verkefnum sem tengja saman hagnýtingu og fræði.
Fjallað er um markaðsrannsóknir sem tæki við ákvarðanatöku. Farið er yfir rannsóknarferlið og hönnun rannsókna. Notkun fyrirliggjandi gagna við markaðsrannsóknir. Kynning á notkun eigindlegra og megindlegra rannsóknaraðferða við markaðsrannsóknir. Grunnatriði við hönnun og gerð spurningakannana. Fjallað er um úrtaksaðferðir og gerðir úrtaka. Sérstök áhersla er á gagnameðhöndlun með SPSS þar sem nemendur sýni leikni sína í notkun tölfræði (fylgnistuðlum, krosstöflum, vikmörkum o.fl.). Persónufrelsi og markaðsrannsóknir. Markaðsrannsóknir á Íslandi. Í námskeiðinu vinna nemendur hópverkefni sem felst í hönnun, framkvæmd og úrvinnslu úr spurningakönnun.
Viðfangsefni námskeiðsins er neyslumenning og neytendahegðun. Með grunnskilning á neyslumenningu og félagslegum birtingarmyndum hennar er veitt innsýn inn í hegðun neytenda og sýnt fram á mikilvægi fræðilegrar þekkingar á neyslumenningu samtímans fyrir markaðsfærslu þjónustu sem og vöru. Er sjónarhorninu beint fyrst og fremst á Vesturlönd. Áhersla er lögð á menningu, kaupákvörðunarferlið þar sem m.a. er fjallað um hvata til kaupa, ákvörðunarþætti, líkön ákvarðanatöku, formgerð markaða og markaðshlutun.
Fjallað er um sérkenni og söluráða þjónustu. Farið er ítarlega í markaðsfærslu þjónustu þar sem dreginn er fram munur á markaðsfærslu þjónustu annars vegar og markaðsfærslu áþreifanlegra vara hins vegar. Lögð er áhersla á þau atriði sem sérstaklega þarf að gæta að við markaðssetningu þjónustu. Fjallað er um áhrifaþætti á væntingar og skynjun viðskiptavina, kauphegðun, mælingar á þjónustugæðum, og mikilvægi þess að byggja upp langtímasamband við viðskiptavini. Þá er farið í hönnun þjónustu, staðla og þjónustuumgjörð og hlutverk viðskiptavina og starfsmanna í framkvæmd þjónustu eru skoðuð. Jafnvægi milli framboðs og eftirspurnar þjónustu, verðlagning, afhending í gegnum milliliði og markaðsleg boðmiðlun þjónustu eru einnig mikilvæg viðfangsefni þessa námskeiðs.
Sérreglur kröfuréttar, aðallega viðskiptabréfareglur. Farið verður yfir reglur um kröfuábyrgðir, veðréttindi og þinglýsingar og helstu reglur sem gilda um fjármálamarkaðinn. Fjallað um verðbréfasjóði, verðbréfaviðskipti, lög um fjármálafyrirtæki, lög um kauphallir og skipulagða tilboðsmarkaði. Opinbert eftirlit með fjármálafyrirtækjum.
Í námskeiðinu er fjallað um helstu undirstöðuhugtök gæðastjórnunar og þróun hennar í gegnum tíðina. Skoðað verður framlag lykilfrumkvöðla á sviðinu og hvernig hugmyndir þeirra hafa mótað nútímalega gæðamenningu og stjórnarhætti. Áhersla er lögð á PDCA-hringrásina, stöðugar umbætur, liðsvinnu og notkun umbótaferla og verkfæra við greiningu og lausn vandamála.
Fjallað verður um altæka gæðastjórnun (e. Total Quality Management), fyrirtæki sem safn ferla og áskoranir tengdar breytingastjórnun. Rætt verður um mikilvægi þess að skilja breytileika í ferlum og nauðsyn náinnar samvinnu við birgja til að stuðla að stöðugleika í framleiðslu og/eða þjónustu.
Einnig verður farið yfir ýmis gæðaverðlaun, vottunarkerfi, gæðakostnað og stefnumótun í gæðamálum. Kennd verða grundvallaratriði tölfræðilegrar gæðastýringar, straumlínustjórnunar (e. lean management) sem og aðferðir til að greina og uppræta rót vandamála.
Að lokum verður fjallað um innleiðingu gæðastjórnunar í skipulagsheildum og mikilvægi náms, þekkingarmiðlunar og þjálfunar starfsmanna við að skapa og viðhalda gæðamenningu.
Fjallað er ítarlega um kynningarráðana: Auglýsingar, söluhvatar, bein markaðssetning, internetið og gagnvirkir miðlar, persónuleg sala og almannatengsl/fréttaumfjöllun. Samskiptaferlið er greint og þættir þess skoðaðir sem og kauphegðun og ákvörðunarferli neytenda. Þá er fjallað um mismunandi miðla, kosti þeirra og galla. Lögð er áhersla á að kynna mikilvægi stefnumótunar og setningu markmiða í markaðsstarfi og hvernig útbúa eigi markaðs- og kynningaráætlun. Þættir sem snúa að hönnun skilaboða eru skoðaðir gaumgæfilega og einnig hvað felst á bak við hugtakið "skapandi stefna". Þá er fjallað um mikilvægi þess að mæla skilvirkni boðmiðlunar og hvaða leiðir eru færar til þess. Hlutverk alþjóðlegrar boðmiðlunar eru gerð skil og komið er inn á félagsleg, siðferðisleg og efnahagsleg sjónarmið auglýsinga- og kynningarmála.
Farið er nánar í ýmsa þætti boðmiðlunarferlisins, með ríka áherslu á almannatengsl. Tekin eru fyrir áhugaverð efnisatriði s.s. eins og almannatengsl og fréttaumfjöllun, hvernig þetta nýtist fyrirtækjum, almannatengsl á netinu, félagsleg markaðssetning, stjórnun orðspors, og áfallastjórnun svo dæmi séu tekin. Mikil áhersla er lögð á sjálfstæð vinnubrögð og þátttöku nemenda í tímum.
Markmið námskeiðsins er að veita nemendum þekkingu á íslenska sveitarstjórnarstiginu, stjórnun, rekstur og starfsemi sveitarfélaganna. Helstu efnisþættir eru:
Lokaverkefni miðast við að þjálfa nemendur í sjálfstæðum rannsóknavinnu er lúta að öflun gagna, greiningu á þeim og framsetningu á niðurstöðum. Verkefnið er sjálfstæð vinna nemenda undir handleiðslu kennara. Verkefnið skal vera á því sérsviði sem nemandinn hefur valið. Lokaverkefni miðast við að undirbúa nemendur til frekari náms og stunda sjálfstæðar rannsóknir. Nemendur verða að hafa lokið að lágmarki 120 ECTS einingum áður en hægt er að byrja vinnu við lokaverkefnið. Sjá nánar „Leiðbeiningar um lokaverkefni“.
Ása er verkefnastjóri fyrir viðskiptafræði. Hún tekur vel á móti þér og svarar þeim fyrirspurnum sem þú kannt að hafa. Meira um Ásu.
Herdís er verkefnastjóri fyrir líftækni og sjávarútvegsfræði. Hún tekur vel á móti þér og svarar þeim fyrirspurnum sem þú kannt að hafa. Meira um Herdísi.