Diplómagráðan er fyrir þá sem hafa áhuga á tölvunarfræði og vilja auka við þekkingu sína. Hún er einnig fyrir þá sem hafa nú þegar háskólagráðu og vilja bæta við sig BS-gráðu í tölvunarfræði á tveimur árum.

Nám í tölvunarfræði við Háskólann á Akureyri er byggt upp í samstarfi við Háskólann í Reykjavík. Diplómagráðan er bæði í boði við HA og á Reyðarfirði í Fróðleiksmolanum.

Námsefni kemur frá HR. Kennsla fer fram í HA og á Reyðarfirði í sveigjanlegu námi og stúdentar mæta vikulega í verkefnatíma. Stúdentar hafa gott aðgengi að kennurunum bæði í HA og HR. Stúdentar eru skráðir í námið við HR og borga skólagjöld samkvæmt gjaldskrá þess skóla.

Einnig er í boði 3 ára BS-gráða:

Er námið fyrir þig?

  • Hefur þú áhuga á að búa til tölvuleiki?
  • Vilt þú vinna við þróun á hugbúnaði?
  • Eru stór gagnasöfn og flókin netkerfi málið?
  • Langar þig til að kóða vefsíður?
  • Finnst þér sýndarveruleiki áhugaverður?
  • Er gervigreind heillandi?
  • Kanntu að beygja orðið tölva?

Áherslur námsins

Diplómanám í tölvunarfræði er samsvarandi fyrstu tveimur árunum í BS-námi í tölvunarfræði.

Megináhersla er lögð á forritun ásamt fleiri grunnfögum tölvunarfræðinnar. Farið er í hugbúnaðarhönnun, stýrikerfi, netkerfi og gagnasöfn.

Í náminu er reynt að hafa jafnvægi milli fræðilegrar undirstöðu og hagnýtrar þekkingar á nýjustu tækni og aðferðum.

Námið er skipulagt sem fullt nám í tvö ár.

Þú getur smellt hér og lesið meira um skipulag námsins á vef Háskólans í Reykjavík.

Möguleikar að námi loknu

Stúdentar hafa að loknu námi diplómapróf í tölvunarfræði og þar með staðfestingu á því að hafa grunnþekkingu og þjálfun í faginu.

Stúdentar geta að námi loknu ákveðið að halda áfram og bæta við sig einu námsári. Þá útskrifast þeir með BS-próf í tölvunarfræði og geta sótt um réttindi til að nota lögverndaða starfsheitið tölvunarfræðingur.

Félagslífið

Félagslíf er mikilvægur þáttur háskólanáms og er félagslíf nemenda við HA öflugt.

Allir stúdentar við háskólann eru í Stúdentafélagi Háskólans á Akureyri (SHA) en einnig er hver deild með sitt nemendafélag. Data er félag tölvunarfræðinema við HA og þú getur nálgast nánari upplýsingar um félagið á Facebook.

Inntökuskilyrði

Almenn krafa er að umsækjandi hafi lokið stúdentsprófi eða sambærilegu prófi.

Hér getur þú lesið meira um inntökuskilyrði Háskólans í Reykjavík.

Sveigjanlegt nám

Flestir hefðbundnir fyrirlestrar eru teknir upp og settir á kennsluvef. Þannig getur þú horft á fyrirlestra þegar þér hentar og eins oft og þú vilt. Okkur þykir samt frábært að fá tækifæri til að hitta þig í kennslustund.

Helsti kostur sveigjanlega námsins er að þú mættir í verkefnatíma í HA eða á Reyðarfjörð þar sem kennari er á staðnum. Þar gefst þér tækifæri til að hitta kennara, samnemendur og annað starfsfólk háskólans og tengjast enn betur háskólasamfélaginu þínu.

Vinsamlega athugið að hver vika í fullu háskólanámi er ígildi 50-60 stunda vinnuviku.

Skiptinám

Stúdentar eiga kost á að taka hluta af námi sínu við erlenda samstarfsháskóla. Alþjóðaskrifstofa HR aðstoðar þig við að sækja um námið, húsnæði og nemendastyrk.

Þú getur smellt hér og lesið meira um skiptinám HR.

 Sækja um

Sótt er um námið á vefsíðu HR. Athugið að velja “HA” valkostinn.

Fara á umsóknarvef HR.

Umsagnir

Krefjandi en jafnframt skemmtilegt nám sem undirbýr mann vel fyrir atvinnulífið. Frábært að geta tekið námiđ í stađnámi og vera hluti af hóp.

Hildur Andrjesdóttir
Forritari hjá Þulu

Námið sjálft einkenndist sérstaklega af stórum, skemmtilegum og raunhæfum verkefnum sem eru í takt við vinnuna mína í dag. Þó kom mér mest á óvart hvað kennarar voru aðgengilegir og alltaf til í að aðstoða ef maður var fastur í verkefni.

Dagur Arinbjörn Daníelsson
Forritari hjá CCP

Á tímamótum í mínu lífi tók ég þá ákvörðun um að skella mér í háskóla og varð tölvunarfræði við HR fyrir valinu. Ég sé alls ekki eftir því þar sem námið uppfyllti allar mínar þarfir um krefjandi viðfangsefni, áhugasama kennara og tengsl við atvinnulífið.

Tómas Sævarsson
Verkefnastjóri hjá Wise