Námið styrkir fagfólk í að takast á við áskoranir sem felast í þjónustu við fólk með fötlun eða langvinnan heilsufarsvanda. Endurhæfing og stuðningur við heilsulausa til þátttöku í samfélaginu kallar á aukna þekkingu og sérhæfingu heilbrigðisstarfsmanna.
Námið veitir prófgráðuna meistarapróf í heilbrigðisvísindum með áherslu á fötlun og endurhæfingu.
Sólrún Óladóttir, umsjónarkennari námskeiðis aðstoðar þig við að setja þér markmið innan námslínunnar og velja saman námskeið.
Skyldunámskeið námslínunnar eru fjögur, samtals 40 ECTS einingar. Meistaraverkefni er 60 einingar og byggist á rannsókn. Þú hefur svo val um námskeið upp að 20 ECTS einingum.
Athugið að flest námskeið eru kennd annað hvert ár og taka þarf tillit til þess við gerð námsáætlunar.
Þú getur skoðað skipulag námsins í Uglu, kennsluvef háskólans.
Námið er skipulagt þannig að mögulegt er að stunda vinnu samhliða því. Nemendur vinna verkefni í stað prófa.
Diplóma- og meistaranemendur eru hvattir til að mæta í allar lotur í námskeiðum. Til að standast lágmarkskröfur námskeiðs við framhaldsnámsdeild heilbrigðisvísindasviðs HA þarf nemandi að mæta í að minnsta kosti tvær af þremur lotum í hverju námskeiði sem hann er skráður í.
Umsjónarkennara námskeiðs er frjálst að setja kröfu um mætingu í einhverja ákveðna lotu eða allar þrjár loturnar í námskeiði. Þessar kröfur geta verið mismunandi á milli námskeiða.
Mæting miðar við að mæta á staðinn eða með samþykki umsjónarkennara viðkomandi námskeiðs að mæta í gegnum Fjærveru eða Zoom. Ath. nemandi þarf að fá þjálfun hjá Kennslumiðstöð HA til að geta nýtt sér Fjærveru sem mætingu í námskeið.
Ef nemandi getur af heilsufarsástæðum ekki mætt í lotu verður viðkomandi að hafa samband fyrirfram við umsjónarkennara námskeiðs og skila vottorði til skrifstofustjóra heilbrigðisvísindasviðs, fari umsjónarkennari fram á það. Umsjónarkennari ákvarðar hvaða viðbótarverkefni nemandi þarf að gera í stað mætingarinnar til að standast lágmarkskröfur námskeiðs.
Þú getur tekið meistaranámskeið við Háskólann á Akureyri eða aðra háskóla, innanlands eða utan.
Brautskráðir nemendur með meistaranám í heilbrigðisvísindum fara í stjórnunarstörf innan heilbrigðiskerfisins, starfa sjálfstætt eða eru í stöðum sérfræðinga.
Námið er undirbúningur fyrir þá sem hyggja á doktorsnám.
Umsækjendur um meistara- og diplómanám þurfa að hafa lokið bakkalárgráðu á sviði heilbrigðisvísinda eða skyldra greina með fyrstu einkunn (7,25 eða hærra) frá viðurkenndum háskóla. Ef til aðgangstakmarkana kemur við innritun ganga þeir umsækjendur fyrir sem hafa nú þegar lokið viðbótardiplóma- eða meistaraprófi og/eða hafa 2 ára starfsreynslu úr heilbrigðis- eða velferðargeiranum. Mikilvægt er að öll umbeðin gögn svo sem staðfest afrit af prófskírteinum, ferilskrá, kynningarbréf og starfsvottorð fylgi með umsókn.
Ég get heilshugar mælt með meistaranáminu við HA. Spennandi námskeið og svo áhugasamir og hvetjandi kennarar!
Ég bjó erlendis megnið af námstímanum, stundum þurfti ég að koma í lotur, en oftast gat ég fengið að taka þátt í gegnum fjærverur eða á Zoom.
Þessi rafræni möguleiki bjargaði náminu hjá mér.
Áslaug Lind Guðmundsdóttir er verkefnastjóri við Heilbrigðis-, viðskipta- og raunvísindasvið. Hún tekur vel á móti þér og öllum þeim fyrirspurnum sem þú kannt að hafa til hennar.
