Háskólinn á Akureyri er eini háskólinn á Íslandi sem býður upp á sveigjanlegt nám í hjúkrunarfræði.
Hjúkrunarfræðinámið við Háskólann á Akureyri hefur fengið alþjóðlega viðurkenningu. Námið er krefjandi og skemmtilegt og niðurstöður kannana meðal nemenda sýna ánægju með gæði og innihald námsins.
Nám í hjúkrunarfræði er fyrir öll kyn.
Samkeppnispróf eru haldin við lok fyrsta misseris og ákvarða hverjir fá að halda áfram námi á vormisseri fyrsta árs.
Áhersla er lögð á að nemendur verði faglega færir til að gegna hjúkrunar-, stjórnunar- og fræðslustörfum á öllum sviðum heilbrigðisþjónustu.
Áhersla er á hjúkrun sjúkra, heilsueflingu, fræðslu og ráðgjöf, og tengingu á milli bóklegs og klínísks náms.
Nemendur læra að meta og bregðast við þörfum fólks á öllum aldri út frá heilbrigði, lífsgæðum og heilsufarsvanda.
Markmiðið er að mennta einstaklinga í hjúkrunarfræði í samræmi við þarfir samfélagsins hverju sinni og alþjóðlega staðla.
Þú lærir almenn hjúkrunarstörf auk stjórnunarstarfa. Þú lærir að miðla fræðsluefni til þinna skjólstæðinga. Klínískt nám á heilbrigðisstofnunum byrjar strax á fyrsta námsári og tekur samtals 24 vikur.
Klínískt nám er hluti af náminu og hefst á fyrsta námsmisseri. Landspítali og Sjúkrahúsið á Akureyri eru meðal samstarfsstofnana sem gera kröfur um að nemendur séu bólusettir fyrir ákveðnum sjúkdómum. Nánari upplýsingar má finna hér.
Á námstíma verða hjúkrunarfræðinemar afla sér þriggja mánaða starfsreynslu á heilbrigðisstofnunum utan skipulegs námstíma. Nánari upplýsingar má finna undir 13. lið reglna matsnefndar hjúkrunarfræðideildar.
Þú getur skoðað skipulag námsins í Uglu, kennsluvef háskólans.
BS próf í hjúkrunarfræði frá Háskólanum á Akureyri gefur rétt til að sækja um hjúkrunarleyfi á Íslandi sem getur verið lykillinn að því að starfa hvar sem er í heiminum.
Hjúkrunarfræðingar starfa víða að því að auka heilbrigði og lífsgæði fólks, til dæmis á sjúkrahúsum, heilsugæslustöðvum og á öðrum heilbrigðisstofnunum. Einnig við sjúkraflutninga, í heimahúsum, við kennslu og í alþjóðlegu hjálparstarfi. Tækifærin eru óendanlega fjölbreytt.
Námið veitir einnig rétt til framhaldsnáms bæði hérlendis og erlendis. Háskólinn á Akureyri býður uppá framhaldsnám á meistara- og doktorsstigi.
Félagslíf er mikilvægur þáttur háskólanáms og er félagslíf nemenda við HA öflugt.
Allir nemendur við háskólann eru í Stúdentafélagi Háskólans á Akureyri (SHA) en einnig er hver deild með sitt nemendafélag. Eir er félag heilbrigðisvísindanema og þú getur nálgast nánari upplýsingar um félagið á Facebook.
Almenn krafa er að umsækjendur hafi lokið stúdentsprófi, lokaprófi frá framhaldsskóla á þriðja hæfniþrepi, jafngildu erlendu prófi eða 60 ECTS einingum frá viðurkenndum háskóla.
Umsækjendur sem uppfylla almenn inntökuskilyrði fá tækifæri til þess að hefja nám á haustmisseri. Samkeppnispróf eru haldin við lok haustmisseris á 1 námsári.
Við viljum benda á að ef fjöldi umsækjenda sem uppfyllir almenn inntökuskilyrði fer yfir fjöldaviðmið verður umsóknum forgangsraðað á eftirfarandi hátt:
Umsækjendum verður svo raðað upp samkvæmt samlagningu þessa þátta og teknir inn í þeirri röð.
Hér getur þú lesið meira um inntökuskilyrði háskólans.
Umsóknir sem ekki teljast uppfylla almenn inntökuskilyrði eru metnar sjálfstætt. Ferilskrá og kynningarbréf eru valkvæð gögn í umsóknargátt en styrkja umsókn. Einnig starfsvottorð frá vinnuveitanda hafi umsækjandi unnið störf í heilbrigðis- eða velferðarþjónustu.
Samkeppnispróf eru haldin við lok haustmisseris á 1 námsári. Þeir sem ná bestum árangri geta haldið áfram með námið. Fjöldi þeirra stúdenta, sem öðlast rétt til náms á vormisseri 1. námsárs er ákveðinn af háskólaráði árlega (um 75 stúdentar).
Námið í hjúkrunarfræðideild er sveigjanlegt nám með fyrirfram ákveðnum námslotum. Nemendur geta því stundað nám sitt óháð búsetu. Allir nemendur fylgja sömu námskrá og námskröfur eru þær sömu.
Flestir hefðbundnir fyrirlestrar eru teknir upp og settir á kennsluvef ásamt öðru námsefni. Þannig getur þú horft á fyrirlestra þegar þér hentar og eins oft að þú vilt. Þú getur jafnvel hægt eða hraðað á hljóðinu.
Í námslotum mæta nemendur í Háskólann á Akureyri og taka virkan þátt í kennslustundum. Þar gefst tækifæri til að hitta kennara, samnemendur og annað starfsfólk háskólans og tengjast háskólasamfélaginu.
Við hjúkrunarfræðideild Háskólans á Akureyri er skyldumæting í námslotur. Dagsetningar á öllum námslotum eru birtar fyrir upphaf skólaárs og mikilvægt er að nemendur kynni sér þær dagsetningar tímanlega.
Vinsamlega athugið að hver vika í fullu háskólanámi er ígildi 50-60 stunda vinnuviku.
Klínískt nám fer fram á heilbrigðisstofnunum um allt land og öðrum starfsstöðvum hjúkrunarfræðinga á fyrirfram ákveðnum námstímabilum, sem eru birtar fyrir upphaf skólaárs. Á námstímanum verða hjúkrunarfræðinemar að afla sér þriggja mánaða starfsreynslu á heilbrigðisstofnunum utan skipulags námstíma.
Nemendur þurfa að hafa lokið öllum námskeiðum fyrsta og annars námsárs til þess að geta hafið nám á þriðja námsári.
Hér getur þú lesið meira um sveigjanlega námið og séð hvenær námslotur eru.
Nemendur geta sótt um að taka hluta af námi sínu við erlenda samstarfsháskóla. Einnig geta nemendur sótt um að stunda klínískt nám við samstarfsstofnanir á öðrum Norðurlöndum. Umsóknir um skiptinám og val á námskeiðum er unnið í samráði við formann hjúkrunarfræðideildar.
Alþjóðafulltrúi veitir nánari upplýsingar um námspláss, húsnæði og nemendastyrki.
Hjúkrunarfræðinámið við HA er fjölbreytt, krefjandi og skemmtilegt. Margir góðir kennarar koma að kennslunni og námið býður upp á ótal möguleika að því loknu. Að geta stundað námið hvaðan af landinu sem er, óháð búsetu, er mikill kostur. Ég stundaði fjarnám við skólann og það var alltaf gaman að koma í lotur á Akureyri. Ávallt var tekið vel á móti fjarnemum og skólaumhverfið er hlýlegt og persónulegt.
Sem menntaður myndlistarmaður, tveggja barna móðir og á þeim tíma búsett í Berlín, þakkaði ég Háskólanum á Akureyri á hverjum degi fyrir að gera mér kleift að stunda hjúkrunarfræðinám. HA var lykilatriði á leið minni í átt að ljósmóðurdraumnum sem nú hefur ræst. Get ekki mælt nógu mikið með hjúkrunarfræðinni við HA. Takk fyrir mig!
Sveigjanleiki námsins og persónuleg samskipti við starfsfólk skólans gerðu námið mitt í HA að einstaklega skemmtilegri og gagnlegri reynslu. Þeir möguleikar sem skólinn býður upp á í sambandi við fjarnám hafa gagnast mér mjög vel, en ég hef getað haldið áfram með framhaldsnám mitt í heilbrigðisvísindum við skólann þrátt fyrir flutninga erlendis. Ég er því einstaklega þakklát fyrir að hafa getað nýtt mér þann möguleika sem skólinn býður upp á að getað stundað nám á Íslandi óháð búsetu.
Meginviðfangsefni námskeiðsins eru hugtök, kenningar og rannsóknir sem liggja að baki hjúkrun sem fræðigreinar. Fjallað er um uppbyggingu og gildi góðra samskipta og hvernig samskipti eru notuð sem meðferðarform í hjúkrun. Farið er yfir skilgreiningu á störfum og hlutverkum hjúkrunarfræðinga sem fagmanna og heilbrigðiskerfið kynnt. Fjallað er um hjúkrunarferli, grunnendurlífgun, svefn og hvíld, hjúkrun einstaklinga með langvinna sjúkdóma og lög um réttindi sjúklinga.. Markmiðið er að gefa nemendum innsýn inn í faglegan grunn starfs hjúkrunarfræðingsins. Námskeiðinu er ætlað að leggja grunn að námi í öðrum hjúkrunarfræðiáföngum.
Námskeiðið miðar að því að þjálfa nemendur í helstu grundvallaratriðum fræðilegra vinnubragða. Í námskeiðinu er fjallað um helstu gerðir rannsókna og markmið þeirra, hin tvö megin rannsóknar-viðmið rannsókna, þ.e. vísindaheimspekilegar forsendur þeirra. Kynntar eru helstu rannsóknar-aðferðir og er lögð áhersla á að megindlegar og eigindlegar aðferðir séu kynntar sérstaklega. Þá er lögð áhersla á skipulag rannsókna, rannsóknarspurningar, skilgreiningar hugtaka og tilgátur. Heimildavinna, rafræn heimildaleit, tilvísanir í heimildir og heimildaskráning fá vandlega umfjöllun . Fjallað er um úrvinnslu gagna og framsetningu niðurstaðna gagna, m.a. gerð texta, stílbrigði,og grunnatriði framsetningar tölfræðilegra gagna. Þá er fjallað sérstaklega um siðferðileg álitamál í rannsóknum og gagnrýna hugsun í vísindum. Loks er lögð mikil áhersla á að kenna nemendum ritgerðasmíð, uppbyggingu ritgerða og skýrslna og verklag við slíka vinnu. Áhersla er lögð á vinnu minni nemendahópa að sértæku rannsóknarverkefni sem gefur nemendum innsýn og þjálfun í ferli rannsóknar: undirbúning, framkvæmd og framsetningu niðurstaðna.
Á námskeiðinu er fjallað um grundvallaratriði í gerð og starfsemi fruma. Í fyrsta lagi er fjallað um gerð ósérhæfðra fruma, helstu frumulíffæri og hlutverk þeirra. Í öðru lagi er fjallað um helstu flokka lífrænna efnasambanda og efnaskipti frumunnar. Í þriðja lagi er fjallað um sérhæfingu fruma, helstu vefjagerðir og starfsemi sérhæfðra fruma með sérstakri áherslu á taugafrumur. Í fjórða lagi er fjallað um líffræðileg stýrikerfi á sameindastigi og í samhengi við tauga- og innkirtlakerfi. Veruleg áhersla er lögð á sameindalíffræði fruma og að sýna fram á samhengi milli afbrigðilegrar frumustarfsemi og sjúkdóma.
Tilgangur námskeiðsins er að nemendur fræðist um heimspekilega siðfræði, bæði almennt, s.s um hugtök, kenningar og úrlausnarefni, auk sértækra siðferðilegra verkefna heilbrigðisstétta. Markmiðið er að gera nemendur hæfa um að beita aðferðum siðfræðinnar til gagnrýninnar hugsunar, greiningar hugtaka og að geta fært rök fyrir máli sínu. Einnig er markmiðið að nemendur öðlist færni í að takast á við sértæk álitamál er varða einstaklinga er þurfa á heilbrigðisþjónustu að halda, allt frá samskiptum til réttlátrar skiptingu úrræða heilbrigðisþjónustu.
Fjallað er um stoðkerfi líkamans ásamt hringrásarkerfi hans. Kynnt eru grunnhugtök líffærafræðinnar. Fjallað er ítarlega um eftirfarandi líffærakerfi: bein, liði, beinagrindarvöðva, blóðið, hjarta og æðar. Auk þess er farið í fósturfræðilega myndun þessara líffærakerfa.
Námskeiðinu er ætlað að veita greinargóða innsýn í vöxt og þroska mannsins frá vöggu til grafar og helstu kenningar þar að lútandi. Fjallað er um líkamlegan, vitrænan, félagslegan þroska og persónuþroska einstaklinga á mismunandi æviskeiðum. Hugað er að ýmsum þáttum sem hafa áhrif á þroska og atgervi, með áherslu á samspil erfða og umhverfis. Að lokum kynnast nemendur völdum frávikum frá dæmigerðum vexti og þroska.
Tilgangur námskeiðsins er að kynnast lífeðlisfræði helstu líffæra og líffærakerfa mannslíkamans og þannig öðlast grundvallarskilning á lífeðlisfræðilegum forsendum heilbrigðis líkama og orsökum sjúkdóma. Farið er yfir öll meginatriði í lífeðlisfræði hjarta- og blóðrásarkerfis, vöðva, lungna, nýrna og meltingarvegar. Einnig er farið yfir lífeðlisfræði skynfæra og meðvitundar, starfsemi helstu stjórnstöðva í miðtaugakerfi er útskýrð, þ.á.m. stjórn hreyfinga. Þá er fjallað um lífeðlisfræði kynfæra, innkirtla, efnaskipta og ónæmiskerfis. Í verklegum tímum fá nemendur tækifæri til að tengja saman fræðin og raunverulegar aðstæður, en gerðar eru æfingar á spírómetríu, vinnuþolspróf, mælingar á blóðsykri, prófanir á skynfærum o.fl.
Í námskeiðinu er fjallað ítarlega um öll helstu líffærakerfi mannsins. Fjallað er um, vessakerfið, líkamstaugakerfi, ósjálfráða taugakerfið, innkirtlakerfið, öndunarkerfið, meltingarkerfið, þvagkerfið og æxlunarkerfið. Auk þess er farið í fósturfræðilega myndun þessara líffærakerfa.
Í námskeiðinu er haldið áfram þar sem frá var horfið í Hjúkrunarfræði I. Námskeiðinu er ætlað að veita nemendum þekkingu í grundvallarþörfum einstaklinga með tilliti til öryggisþarfa, persónulegrar hirðingar, sýkingavarna, útskilnaðar úrgangsefna og helstu tegunda stóma, lífsmarka, svefns og hvíldar, hreyfingar, hreyfiskerðingar og þrýstingssára. Lögð er áhersla á liðferla og vinnutækni og grundvallaratriði í notkun hjúkrunarferlisins, með sérstakri áherslu á öflun hjúkrunarupplýsinga, mannkosti og persónumiðaða nálgun. Einnig er fjallað um heilsufarsmat og skynjun, málstol, þvoglumæli, kyngingarörðugleika, sjón og sjónskerðingu, lyfjagjafir og lyfjaútreikninga. Nemendur fá kennslu í verklegum hluta grunnskyndihjálpar. Áhersluþáttur í klínísku námi er almenn aðhlynning. Klínískt nám er 2 vikur.
Í fyrsta lagi er fjallað um mikilvægustu flokka lífefna sem koma við sögu í efnaskiptum fruma, þ.e. kolvatnsefni, fitur, prótein, ensím, kóensím og orkufosföt. Í öðru lagi er fjallað um helstu efnaskiptaferla frumunnar, bæði niðurbrotsferli og nýmyndun og áhersla lögð á að skýra hvernig einstök ferli fléttast saman í heildarmynd efnaskipta. Í þriðja lagi er leitast við að útskýra eðli og orsakir ýmissa efnaskiptasjúkdóma auk þess sem fjallað er um átraskanir og skyndilausnir. Í verklegum æfingum eru kynntar helstu efnamælingar í blóði og þvagi.
Farið er yfir undirstöðuatriði sýkla-, ónæmis- og veirufræði, meðal annars starfsemi ónæmiskerfisins, eiginleika, smitleiðir og heimkynni helstu sjúkdómsvaldandi örvera. Einnig verður fjallað um sótthreinsun, dauðhreinsun, smitgát, sýkingar tengdar heilbrigðisþjónustu og lyfjaónæmar bakteríur. Lögð er áhersla á þá þætti sem tengjast klínísku starfi hjúkrunarfræðinga, þar á meðal vönduð vinnubrögð við töku og meðhöndlun sýna.
Námskeiðið snýst um samskiptafærni og samstarfsfærni við notendur/skjólstæðinga og samstarfsfólk þar sem fjallað er um helstu hugmyndir, kenningar og aðferðir er lúta að faglegum samskiptum og tengslum. Meðal annars er fjallað um þverfaglega teymisvinnu og rýnt í hlutverk ólíkra fagstétta innan velferðarkerfisins. Kynntar eru helstu aðferðir í viðtalstækni og nemendur æfa sig í að beita þeim. Nemendur rýna í eigin samskiptahætti og læra að nota samskipti á meðvitaðan hátt til að ýta undir og styrkja ákveðna færni og eiginleika til að takast á við margbreytilegar kröfur þess að vera fagmaður í krefjandi störfum. Auk þess er mikilvægi sjálfsþekkingarfærni og slökunar kynnt fyrir nemendum.
Námskeiðinu er ætlað að fræða nemendur um tengsl samfélags og heilsu, bæði almennt (hugtök, kenningar, rannsóknir) og sértækt, um efni sem varðar félagslega áhrifaþætti heilbrigði og veikinda. Fjallað er m.a. um samband samfélags- og menningargerðar og heilsu, félagslegt skipulag heilbrigðisstofnana og heilbrigðiskerfis, faghópa heilbrigðisþjónustunnar, sjúkdómsvæðingu, heilbrigðisviðhorf, sjúklingshlutverkið, frávik, félagslega dreifingu heilsu og sjúkdóma, og samskipti sjúklinga og fagaðila.
Í námskeiðinu er haldið áfram þar sem frá var horfið í Hjúkrunarfræði II. Námskeiðinu er ætlað að veita nemendum þekkingu á grundvallarþörfum einstaklinga með tilliti til sonda, næringarfræði, loftskipta, verkja- og verkjameðferðar, næringarhjúkrunar og sára- og sárameðferða. Fjallað er um hjúkrun tengda sondum í meltingarvegi og sondumötun, loftskipti og sogun úr loftvegum og sár-og sárameðferð. Í námskeiðinu er lögð áhersla á tengingu fræðilegrar þekkingar við skipulagningu og framkvæmd hjúkrunar og notkun hjúkrunarferlisins við skipulagningu, framkvæmd og mat hjúkrunar. Einnig er fjallað um lög og reglur varðandi skráningu hjúkrunar.
Námskeiðinu er ætlað að gera nemendur færa um að nálgast upplýsingar varðandi heilsu skjólstæðings, skrá þær og meta hvort um sé að ræða frávik frá hinu eðlilega. Í námskeiðinu læra nemendur að afla upplýsinga sem lýsa viðbrögðum skjólstæðings við raunverulegum og líklegum heilsufarsvandamálum, vinna síðan úr þeim og setja fram hjúkrunargreiningar. Fjallað er um viðtalstækni, athugun, hlustun, líkamsskoðun, heimildakönnun og könnun á niðurstöðum rannsókna. Kennslan fer fram í formi fyrirlestra og verklegra æfinga.
Námskeiðinu er ætlað að halda áfram þar sem frá var horfið í HJÚ0306. Helstu viðfangsefni eru hjúkrun einstaklinga með þvaglegg, nudd, lyfjagjafir, lyfjaútreikningar, vökva- og blóðgjafir, hjúkrun einstaklinga sem gangast undir aðgerð, hjúkrun deyjandi einstaklinga og aðhlynning við andlát. Farið er yfir andlegar þarfir og andlega umönnun og viðbótarmeðferðir í hjúkrun. Fjallað er um samskipti, fagmennsku, dygðir, ígrundun og sjálfsrækt, heilsu, heilbrigði og heilsueflingu og áhrif þess í hjúkrun og tengingu þess við kenningar í hjúkrun. Fagmennska, sjálfsskoðun, sjálfsrækt og ígrundun er til umfjöllunar í verkefnavinnu í klínísku námi. Lögð er áhersla á að nemendur læri að beita þekkingu sem þeir öðlast í námskeiðinu sem og í fyrri námskeiðum.
Klínískt nám er 4 vikur. Lögð er áhersla á að nemendur öðlist færni í að beita þekkingu sem þeir öðlast í námskeiðinu sem og í fyrri námskeiðum. Áhersla er á verklegar æfingar í nuddi, lyfjagjöfum, vökva- og blóðgjöfum, uppsetningu æðaleggs og þvagleggs, og aðhlynningu við andlát.
Markmið námskeiðsins er að nemendur fái innsýn í þann hluta hagnýtrar lyfjafræði sem snýr að störfum hjúkrunarfræðinga. Lögð er áhersla á að nemendur öðlist þekkingu á helstu lyfjaflokkum m.t.t. klínískra atriða er varða verkun lyfja og verkunartíma, virk efni og undirflokkanir, aukaverkanir og milliverkanir. Fjallað verður um hvernig nota á sérlyfjaskrá á skilvirkan hátt og ACT lyfjaflokkunin kynnt. Tilgangur námskeiðsins er að auka færni og þekkingu nemenda á lyfjafræði þannig að hún nýtist þeim sem best í störfum þeirra sem hjúkrunarfræðingar.
Fjallað er um rannsóknarsnið, helstu gagnaöflunaraðferðir og tölfræði. Af eigindlegum og megindlegum aðferðum er fjallað um viðtöl, rýnihópa og þátttökuathuganir, tilraunir, spurningakannanir og notkun opinberra gagna í rannsóknum. Þá eru kenndir helstu þættir í lýsandi tölfræði, myndrænni framsetningu gagna og einfaldri framsetningu á niðurstöðum. Kynnt eru grunnatriði í ályktunartölfræði, líkindareikningi og einföld tölfræðipróf. Einnig er farið í grunnatriði aðhvarfsgreiningar. Kynnt er skráning gagna í gagnagrunna og grunnatriði í notkun tölfræðiforrita.
Tilgangur námskeiðsins er að nemendur kynnist mismunandi tækni og leiðum til þess að meta fræðsluþarfir, miðla fræðslu og meta árangur fræðslu. Lögð er áhersla á mikilvægi fræðslu innan heilbrigðisþjónustunnar og hlutverk hjúkrunarfræðinga í heilbrigðis- og sjúklingafræðslu. Jafnframt verður fjallað um heilsulæsi og hugmyndir um innri og ytri forsendur náms fullorðinna.
Viðfangsefni námsskeiðsins er að kynna heimspekilegan og fræðilegan grunn eigindlegra aðferða og útfærslu þeirra og notkun í iðjuþjálfunarfræði, hjúkrunarfræði og öðrum heilbrigðisvísindum. Kynntar verða fyrir nemendum algengar eigindlegar rannsóknir sem og aðferðir við gagnasöfnun og gagnagreiningu. Lögð verður áhersla á ýmis viðfangsefni og álitamál sem tengjast eigindlegum rannsóknum svo sem siðfræðilegum þáttum og trúverðugleika/réttmæti og áreiðanleika. Lögð verður sérstök áhersla í færni í að meta gæði eigindlegra rannsókna og rannsóknarrýni.
Tilgangur námskeiðsins er í aðalatriðum sá að nemandinn kynnist grundvallarhugmyndum og helstu aðferðum sem notaðar eru í geðhjúkrun. Þá er einnig tilgangur að gefa innsýn í helstu einkenni geðsjúkdóma. Nemandi fær í verklegu námi tækifæri til að kynnast og taka þátt í starfi hjúkrunarfræðinga á geðdeild. Áhersla er lögð á að nemandinn fái yfirlit yfir uppbyggingu geðheilbrigðisþjónustunnar í landinu og að hann verði meðvitaður um mikilvægi geðhjúkrunar á hinum ýmsu sviðum heilbrigðisþjónustunnar. Klínískt nám er í námskeiðinu.
Í námskeiðinu felst 3 vikna klínískt nám á heilbrigðisstofnun. Miðað er við 40 stundir á einni viku.
Tilgangur námskeiðsins er að veita nemendum þekkingu í sérhæfðri hjúkrun og sjúkdómum fullorðinna er eiga við skammtíma eða langvinn veikindi að stríða og þarfnast endurhæfingar. Lögð er áhersla á sérstakar hjúkrunarþarfir einstaklinga, fræðslu, næringu, tjáskipti, aðlögun og sjálfsumönnun og farið er yfir aðalatriði meingerðar, einkenna og meðferðar helstu sjúkdóma. Megináhersla er á að nemendur öðlist fræðilega þekkingu í hjúkrun og sjúkdómum fullorðinna. Jafnframt er ætlast til að nemandinn beiti þekkingu úr fyrri hjúkrunarnámskeiðum og námskeiðum í stoðgreinum hjúkrunar og þrói með sér heildræna sýn á hinn veika einstakling og fjölskyldu hans. Klínískt nám er stór hluti námskeiðsins og þar er lögð áhersla á sérstakar hjúkrunarþarfir veikra einstaklinga og fjölskyldna þeirra, fræðslu, næringu, tjáskipti, aðlögun og sjálfsumönnun. Áhersla er á að nemandinn geti tengt fræðilega þekkingu við hjúkrun skjólstæðinga sinna og geti nýtt sér þekkinguna í klínísku námi.
Í námskeiðinu er fjallað um stjórnunarfræði, stjórnunarkenningar og stjórnunarlega uppbyggingu, umgjörð og stefnumótun í íslenskri velferðarþjónustu. Nemendur fá innsýn í ólíkar hugmyndir og aðferðir í stjórnun, s.s. breytingastjórnun, gæðastjórnun og mannauðsstjórnun. Auk þess skoða nemendur hlutverk leiðtogans, gildi handleiðslu, teymisvinnu og eigin reynslu.
Í námskeiðinu er fjallað um samfélagshjúkrun og mismunandi hjúkrunarþarfir í samfélaginu. Fjallað er um hlutverk og ábyrgð hjúkrunarfræðinga innan samfélagsins og mismunandi starfsvettvang og störf hjúkrunarfræðinga í heilsugæslu kynnt. Fjallað er um heilsugæslu í opinberu heilbrigðiskerfi sem og heilsugæslu innan fyrirtækja og í samfélaginu. Hjúkrunarþarfir mismunandi menningarhópa verða ræddar og áherslur í hjúkrun fólks af mismunandi uppruna með hugmyndafræði fjölskylduhjúkrunar að leiðarljósi. Í klíníska náminu er jafnframt ætlast til að nemandinn beiti þekkingu úr fyrri hjúkrunarnámskeiðum og námskeiðum í stoðgreinum hjúkrunar.
Í námskeiðinu felst 2 vikna klínískt nám á heilbrigðisstofnun. Miðað er við 40 stundir á einni viku.
Tilgangur námskeiðsins er að nemendur kynnist helstu kenningum um nám og námsaðferðir og geri sér grein fyrir tengslum þeirra kenninga við fræðslustarf á komandi starfsvettvangi. Lögð verður áhersla á tengingu heilbrigðis- og sjúklingafræðslu við störf hjúkrunarfræðinga. Nemendur kynnast og þjálfast í mismunandi tækni og leiðum til þess að meta fræðsluþarfir, miðla fræðslu og meta árangur fræðslu.
Í námskeiðinu HJF0214 er haldið áfram þar sem frá var horfið í Hjúkrun fullorðinna með vefræna sjúkdóma I. Námskeiðinu er ætlað að veita nemendum þekkingu í sérhæfðri hjúkrun og sjúkdómum fullorðinna er eiga við skammtíma eða langvinn veikindi að stríða eða eru dauðvona. Lögð er áhersla á sérstakar hjúkrunarþarfir einstaklinga, fræðslu, næringu, tjáskipti, aðlögun og sjálfsumönnun og farið yfir aðalatriði meingerðar, einkenna og meðferðar helstu sjúkdóma. Megináhersla er á að nemendur öðlist fræðilega þekkingu í hjúkrun og sjúkdómum fullorðinna. Jafnframt er ætlast til að nemandinn læri að beita þekkingu úr fyrri hjúkrunarnámskeiðum og námskeiðum í stoðgreinum hjúkrunar og þrói með sér heildræna sýn á hinn veika einstakling og fjölskyldu hans.
Klínískt nám er hluti námskeiðsins þar sem áhersla er á sérstakar hjúkrunarþarfir veikra einstaklinga og fjölskyldna þeirra, árangursríka hjúkrunarmeðferð og skráningu hjúkrunar.
Í námskeiðinu felst 3 vikna klínískt nám á heilbrigðisstofnun. Miðað er við 40 stundir á einni viku.
Námskeiðinu er ætlað að veita nemendum þekkingu á helstu þáttum barnahjúkrunar og barnasjúkdómum. Hugmyndafræði barnahjúkrunar og kenningar sem tengjast barnahjúkrun eru kynntar. Lögð er áhersla á hjúkrun sem tekur mið af þörfum barna og fjölskyldna þeirra. Fjallað er um viðbrögð og upplifun barna á veikindum með tilliti til aldurs, þroska og fyrri reynslu. Lögð er áhersla á hjúkrun barna sem leggjast inn á sjúkrahús til að fara í rannsóknir eða skurðaðgerðir, hjúkrun barna með bráðaveikindi, langvinna sjúkdóma og hjúkrun barna sem eru dauðvona. Fjallað er um nokkra algenga og/eða veigamikla sjúkdóma barnsáranna, bæði bráða og langvinna. Leitast er við að veita nemendum innsýn í eðli, tíðni, greiningu og meðferð sjúkdómanna. Í klínísku námi er lögð áhersla á tengingu fræðilegrar þekkingar við hjúkrun barna og foreldra.
Í námskeiðinu felst einnar viku klínískt nám á heilbrigðisstofnun. Miðað er við 40 stundir á einni viku.
Námskeiðinu er ætlað að auka skilning og hæfni nemenda í hjúkrun í bráðatilvikum, innan og utan sjúkrahúsa. Sérstaklega verður lögð áhersla á að nemendur öðlist þekkingu og nokkra færni í fyrstu skoðun slasaðra og bráðveikra einstaklinga. Allir nemendur sækja staðlað námskeið í sérhæfðri endurlífgun I sem viðurkennt er af evrópska endurlífgunarráðinu (ERC). Einnig verður fjallað um hjúkrun á slysa- og bráðamóttöku, gjörgæsludeild, skurðdeild og svæfingadeildum. Klínískt nám er í námskeiðinu.
Í námskeiðinu felst 2 vikna klínískt nám á heilbrigðisstofnun. Miðað er við 40 stundir á einni viku.
Í námskeiðinu er haldið áfram þar sem frá var horfið í Samfélagshjúkrun I. Lögð er áhersla á hjúkrunarfræðinginn sem sjálfstæðan og ábyrgan fagaðila í teymisvinnu innan samfélagsins. Í námskeiðinu er einnig fjallað um forvarnir og heilsueflingu. Áhersla er lögð á kenningar og hugtök innan fjölskylduhjúkrunar. Klínískt nám er í námskeiðinu.
Í námskeiðinu felst 2 vikna klínískt nám á heilbrigðisstofnun. Miðað er við 40 stundir á einni viku.
Námskeiðinu er ætlað að kynna fyrir nemendum þau áhrif sem öldrun hefur á heilsu, líðan, lífsgæði og þjóðfélagsstöðu aldraðra. Áhersla er lögð á öldrunarbreytingar og heilsufarsvandamál aldraðra. Fjallað er um hlutverk, úrræði og ábyrgð hjúkrunarfræðinga við mat á ástandi og aðstæðum aldraðra og fjölskyldna þeirra. Siðferðileg viðmið í umönnun aldraðra verða einnig kynnt og stefnumótun í málefnum aldraðra. Klínískt nám er í námskeiðinu.
Í námskeiðinu felst 2 vikna klínískt nám á heilbrigðisstofnun. Miðað er við 40 stundir á einni viku.
Námskeiðinu er ætlað að veita nemendum þekkingu á heilbrigði kvenna og þeim þáttum sem hafa sérstaklega áhrif á heilsu þeirra á lífsleiðinni, lífsviðburði sem hafa áhrif á heilsu og helstu kvensjúkdóma. Fjallað er um sérhæfða líffæra og lífeðlisfræði kvenna, ásamt uppbyggingu heilbrigðisþjónustu og hvernig hjúkrunarfræðingar geta stuðlað að aukinni heilsu kvenna og fjölskyldna þeirra. Sjónum verður beint að helstu mælikvörðum sem notaðir eru til að mæla heilsu kvenna, sérstaklega með tilliti til, frjósemi og barneigna. Áhersla er einnig á kynheilbrigði, breytingaskeiðið, ofbeldi gegn konum og heilsu þeirra út frá jafnréttissjónamiðum. Auk þess sem fjallað er um sérhæfða fóstur- og erfðafræði, ásamt litningarannsóknum sem eru gerðar í tengslum við meðgöngu.
Í námskeiðinu er fjallað um klíníska forystu og stjórnun innan íslenskrar heilbrigðisþjónustu, með sérstakri áherslu á hlutverk og þátttöku hjúkrunarfræðinga. Unnið verður með helstu kenningar í stjórnun og forystu í ljósi viðfangsefna og áskorana í nútíma heilbrigðisþjónustu, bæði á Íslandi og erlendis. Nemendur afla sér og nýta vísindaleg gögn við að rýna í hlutverk klínískra stjórnenda og helstu þætti daglegrar stjórnunar á vinnustað/deild, m.a. útdeilingu verkefna, gæðastjórnun, innleiðingu breytinga og eflingu mannauðs. Auk þess skoða nemendur og fjalla um teymisvinnu ólíkra fagstétta og leiðtogahlutverk hjúkrunarfræðinga í daglegu starfi.
Sérverkefnið byggir á kerfisbundinni úttekt nemanda á fræðilegu efni og skal unnið sem heimildarsamantekt þar sem markmiðið er að samþætta nýjustu þekkingu innan sérsviðs. Nemendur setja fram eigin námsmarkmið og tímaáætlun, leita eftir vísindagreinum, greina þær, gagnrýna og samþætta með skipulegum og kerfisbundnum hætti. Nemendur ígrunda og kynna niðurstöður sínar munnlega og í undantekningartilvikum gefst þeim kostur á að rita fræðigrein um efnið. Nemendur vinna alla jafna þrír saman í hópi.
Bergþóra er verkefnastjóri fyrir hjúkrunarfræði og iðjuþjálfunarfræði. Hún tekur vel á móti þér og öllum þeim fyrirspurnum sem þú kannt að hafa til hennar. Meira um Bergþóru.