Starfsréttindanám í iðjuþjálfun er framhald af BS námi í iðjuþjálfunarfræði og ætlað þeim sem stefna á að starfa sem iðjuþjálfar.
Namið er fyrir þau sem hafa áhuga á að starfa sem iðjuþjálfar og vinna með einstaklingum, hópum og samfélögum með það að markmiði að efla iðju, þátttöku, heilsu og velferð fólks á öllum aldri. Gráðan tryggir starfsleyfi frá Embætti landlæknis til að vinna sem iðjuþjálfi á Íslandi. Alþjóðleg viðurkenning námsins opnar einnig möguleika á frekara námi og störfum erlendis.
Umsóknarfrestur er frá 15. febrúar til 31. mars
Markmið námsins er að þú verðir sérfræðingur í daglegri iðju og í að vinna með iðjuvanda sem hamlar fólki í hversdeginum, hindrar þátttöku þess og hefur neikvæð áhrif á heilsu og lífsgæði. Þú lærir að vinna með umhverfið, ýta undir jafnrétti til þátttöku í samfélaginu og stuðla að því að fólk blómstri í lífinu.
Starfsréttindanám í iðjuþjálfun er spennandi nám þar sem þú færð tækifæri til að vera samtals 800 stundir á vettvangi í fjölbreytilegu starfsumhverfi iðjuþjálfa. Þar tekst þú á við raunveruleg viðfangsefni með fólki á öllum aldri undir leiðsögn reyndra iðjuþjálfa. Þannig færð þú þjálfun og undirbúning fyrir störf iðjuþjálfa. Þú hefur einnig kost á að stunda hluta af vettvangsnáminu við erlendar samstarfsstofnanir.
Námið er krefjandi og krefst aga og skipulagðra vinnubragða. Stúdentar bera sjálfir ábyrgð á framvindu náms síns og þurfa að sýna ástundun til að ná tilætluðum árangri. Fræðilegur og bóklegur hluti starfsréttindanáms í iðjuþjálfun fer að þó nokkru leyti fram rafrænt, en er ekki sveigjanlegt eins og grunnnám í iðjuþjálfunarfræði. Mun meiri viðveru er krafist vegna lengri vettvangsnámstímabila, samtals 800 stunda á einu ári.
Gráðan tryggir leyfisveitingu frá Embætti landlæknis til að starfa sem iðjuþjálfi á Íslandi.
Iðjuþjálfar starfa á breiðum vettvangi svo sem í heilbrigðis- og félagsþjónustu, skólakerfinu, hjá stofnunum og félagasamtökum og fyrirtækjum á almennum vinnumarkaði. Störf iðjuþjálfa eru fjölbreytt og iðjuþjálfar eru ein af lykilstéttum innan forvarna, vinnuverndar og endurhæfingar.
Alþjóðleg viðurkenning námsins opnar möguleika á frekara námi og störfum erlendis.
Nánar má lesa um iðjuþjálfun á heimasíðu Iðjuþjálfafélags Íslands.
Inntökuskilyrði er BS gráða í iðjuþjálfunarfræði frá HA með einkunn að lágmarki 7,25. Ef fjöldi umsækjenda sem uppfyllir almenn inntökuskilyrði fer yfir fjöldaviðmið verður umsóknum forgangsraðað út frá lokaeinkunn grunngráðu.
Leitast er við að setja ekki fjöldatakmarkanir, en deildin þarf þó að meta hversu marga stúdenta er mögulegt að taka inn árlega út frá kennslukrafti, aðstöðu og fjármagni. Fjöldi stúdenta í starfsréttindanámi afmarkast til dæmis af framboði á vettvangsplássum og getur því verið breytilegur frá ári til árs.
Starfsréttindanám í iðjuþjálfun hefur ekki sama sveigjanleika og grunnnám í iðjuþjálfunarfræði. Stúdentar þurfa að vera í vettvangsnámi á raunverulegum starfsstöðvum iðjuþjálfa í 800 stundir alls, það er:
Vettvangsnámið fer alla jafna fram á hefðbundnum dagvinnutíma. Auk þess þurfa nemendur að vinna í bóklegum námskeiðum og verkefnum jafnt og þétt yfir misserin. Það er því erfitt fyrir stúdenta að sinna atvinnu samhliða starfsréttindanámi í iðjuþjálfun. Stúdentar geta þó valið að taka námið á tveimur árum í stað eins. Með því móti getur nemandi skapað sér ákveðið svigrúm sem gagnast þeim sem ætla sér að vinna samhliða starfsréttindanámi.
Hægt er að kynna sér upplýsingar um námslán á vef Menntasjóðs námsmanna.
Stúdentar geta komið á framfæri óskum við verkefnastjóra vettvangsnáms eða látið vita af sérstökum aðstæðum. Það er þó ekki alltaf hægt að verða við óskum stúdenta um staðsetningu vettvangsnáms. Fer það allt eftir framboði og eftirspurn um vettvangsnám hverju sinni.
Stúdentar fá ekki laun í vettvangsnámi enda er ekki um vinnuframlag að ræða. Í vettvangsnámi fer fram nám á stað þar sem iðjuþjálfun er veitt og stúdentinn er í þeirri sérstöku stöðu að vera undir leiðsögn starfandi iðjuþjálfa. Áhersla er á að stúdentinn fái námstækifæri til að ná hæfniviðmiðum þess námskeiðs sem vettvangsnámið er hluti af.
Í námi á vettvangi er mikilvægt að stúdentinn fái þjálfun í að þjónusta einstaklinga og hópa eða sinna ákveðnum verkefnum sem tengjast störfum iðjuþjálfa. Markmiðið er að stúdentinn öðlist aukna færni í að verða fær fagmaður og sé í lok námsins tilbúinn til að hefja störf sem nýútskrifaður iðjuþjálfi. Þannig eru gerðar stigvaxandi kröfur til stúdentans í þeim þremur þjónustunámskeiðum sem um ræðir og innihalda samtals 800 stundir á vettvangi (þar að auki hafa 200 stundir þegar farið fram í iðjuþjálfunarfræði – til BS gráðu).
Námið í iðjuþjálfun var ótrúlega gagnlegt og undirbjó mig á fjölbreytta vegu fyrir atvinnulífið en var ekki síður mótandi persónulega. Ég upplifi starfsfmöguleika mína einungis takmarkast við áhugasvið mitt með menntunina í farteskinu
Ég hafði verið í háskólanámi áður og unnið við allt milli himins og jarðar. Að þeirri reynslu fenginni þá veit ég að það er vandfundið háskólanám sem er jafn gagnlegt og opnar jafnmargar dyr í lífinu, bæði í leik og starfi, og iðjuþjálfun. Ég er stolt af að vera iðjuþjálfi og þakklát fyrir að hafa fattað að hún er til.
Námskeiðið snýst um að efla fagþroska og vitund nemenda um eigin stöðu, hlutverk og ábyrgð sem verðandi iðjuþjálfi. Skoðaðar eru kenningar og rannsóknir á fagímynd og fagmennsku á sama tíma og áhersla er lögð á að nemendur styrki sig í faglegu starfi og verði meðvitaðir um samspil eigin fagsjálfs og einkasjálfs. Nemendur ígrunda eigin rökleiðsluleiðir og rýna í mismunandi þjónustuaðstæður og vinnubrögð sem þeir kynnast á vettvangi.
Þetta er fyrsta námskeiðið af þremur sem undirbýr nemendur markvisst fyrir störf iðjuþjálfa. Námið fer fram bæði innan og utan háskólans, en 205 tíma vettvangsnám er samþætt við bóklegt nám (4 ECTS einingar). Meginviðfangsefni nemenda er þjónusta við ákveðinn aldurshóp skjólstæðinga. Beitt er lausnamiðuðum námsaðferðum (PBL) þar sem nemendur kynnast ólíkum matsaðferðum og íhlutunarúrræðum fyrir hópinn áður en þeir fara á vettvang. Á vettvangi fá nemendur úthlutað leiðbeinanda sem er starfandi iðjuþjálfi á staðnum. Auk þess taka þeir þátt í handleiðsluhóp sem er stýrt af kennara með sérþekkingu á þjónustu við ákveðinn aldurshóp (börn/ungmenni, fullorðnir, aldraðir). Á vettvangi gefst nemendum tækifæri til að þjálfa sig í faglegum samskiptum og beita faglegri rökleiðslu.
Þetta er annað námskeiðið af þremur sem er beintengt starfi iðjuþjálfa. Eins og í námskeiðinu á undan fer námið fram bæði innan og utan skólans, en 240 tíma vettvangsnám er samþætt við bóklegt nám (3 ECTS). Meginviðfangsefni nemenda er aftur þjónusta við skilgreindan aldurshóp, en ekki sami hópur og í námskeiðinu á undan. Lausnamiðuðum námsaðferðum (PBL) er aftur beitt. Auk þjálfunar í að veita einstaklingsmiðaða þjónustu er einnig lögð áhersla á þjónustu við hópa og samfélög. Nemendur fá leiðbeinanda á vettvangi sem er starfandi iðjuþjálfi á staðnum og taka einnig þátt í handleiðsluhóp sem er stýrt af kennara með sérþekkingu á þjónustu við viðkomandi aldurshóp. Á vettvangi taka nemendur smám saman aukna ábyrgð á þjónustu við skjólstæðinga og samskiptum við aðstandendur, samstarfsfólk og aðra um leið og þeir auka hæfni sína í að skipuleggja og veita þjónustu við hæfi.
Námskeiðið snýst um þróun faggreina og fagstétta og ábyrgð fagfólks á eigin fagi og framtíð þess sem fræðigreinar og starfs. Nemendur skoða sögu eigin fagstéttar hér á landi í ljósi kenninga og rannsókna um fagþróun og spegla hana í stöðu og þróun annarra stétta í velferðarþjónustu. Fjallað er um markmið og starfsemi ýmissa faglegra samtaka og hópa á innlendum og alþjóðlegum vettvangi og rýnt í grundvallarlögmál þeirra, hugmyndir og gildi með gagnrýnu hugarfari. Námskeiðið er að hluta til í formi málstofu þar sem áhersla er á að ýta undir gagnrýna hugsun og skoðanaskipti nemenda.
Þetta er síðasta námskeiðið af þremur um þjónustu iðjuþjálfa og lokaatriðið í undirbúningi nemanda til að öðlast starfsréttindi sem iðjuþjálfi. Eins og í fyrri þjónustunámskeiðum fer námið fram bæði innan og utan skólans, en 355 tíma vettvangsnám er hluti af námskeiðinu ásamt bóklegu námi (2 ECTS einingar). Meginviðfangsefni nemenda er enn þjónusta við ákveðinn aldurshóp (þ.e. börn/ungmenni, fullorðnir eða aldraðir) og þeir þjálfa sig nú í ólíkum matsaðferðum og þjónustuleiðum fyrir síðasta hópinn, eftir því hvaða reynslu þeir hafa fengið í undanfarandi þjónustunámskeiðum. Lausnamiðuðum námsaðferðum (PBL) um þjónustu við markhópinn er áfram beitt, en í þetta sinn með viðbótaráherslu á leiðir til að rýna í og hafa áhrif á þjónustuumhverfið í víðum skilningi. Á vettvangi fá nemendur úthlutað leiðbeinanda sem er starfandi iðjuþjálfi á staðnum auk þess sem þeir taka þátt í handleiðsluhóp sem er stýrt af kennara með sérþekkingu á þjónustu við viðkomandi aldurshóp. Í lok vettvangstímabils taka nemendur að mestu ábyrgð á þjónustunni sem þeir veita og faglegum samskiptum við skjólstæðinga sína, samstarfsfólk og aðra hagsmunaaðila. Námskeiðinu lýkur með munnlegu prófi þar sem nemandi gerir grein fyrir og ræðir þjónustu sína við ákveðinn skjólstæðing (einstakling, hóp eða samfélag) í faglegu samhengi.
Nemendur velja námskeið í samráði við kennara/deildarforseta
Áslaug Lind Guðmundsdóttir er verkefnastjóri við Heilbrigðis-, viðskipta- og raunvísindasvið. Hún tekur vel á móti þér og öllum þeim fyrirspurnum sem þú kannt að hafa til hennar.