Verkakonur, vellíðan og velferðarkerfið

Andrea Sigrún Hjálmsdóttir lektor við Félagsvísindadeild, Bergljót Þrastardóttir lektor við Kennaradeild, Berglind Hólm Ragnarsdóttir lektor við Félagsvísindadeild við Háskólann á Akureyri og Valgerður S. Bjarnadóttir lektor við Menntavísindasvið Háskóla Íslands birtu í gær grein sem ber heitið „Konur af erlendum uppruna í íslensku velferðarsamfélagi: Staða á vinnumarkaði, félagsleg tengsl og líðan“. Greinin birtist í Íslenska þjóðfélaginu og er hluti af rannsóknarverkefninu Verkakonur, vellíðan og velferðarkerfið sem Berglind Hólm leiðir.

Tilgangur rannsóknarinnar er að draga fram þætti sem tengjast félagslegri stöðu og tækifærum kvenna af erlendum uppruna í samanburði við konur af íslenskum uppruna, með því að varpa ljósi á stöðu á atvinnu- og húsnæðismarkaði, félagsleg tengsl og einkenni streitu, kvíða og þunglyndis. Rannsóknin byggist á nokkuð umfangsmikilli könnun sem lögð var fyrir konur á aldrinum 25–64 ára á vormánuðum 2022.

Helstu niðurstöður

Í samanburði við konur af íslenskum uppruna búa konur af erlendum uppruna við meira óöryggi og krefjandi aðstæður á vinnu- og húsnæðismarkaði, fjárhagsstaða þeirra er verri og þær eru ólíklegri til að fá menntun sína metna að verðleikum. Félagsleg tengsl þeirra eru takmarkaðri og andleg líðan þeirra verri. Þá kemur tímaskortur og fjárhagsstaða í veg fyrir að þær leiti sér aðstoðar vegna andlegrar vanlíðanar. Niðurstöðurnar varpa þannig ljósi á ójöfnuð meðal kvenna í íslensku velferðarsamfélagi, þar sem konur af erlendum uppruna búa við fjölþættari samfélagslegar hindranir sem koma í veg fyrir inngildingu og jöfn tækifæri. Niðurstöðurnar ógna þannig ímyndinni um hið sterka velferðarsamfélag sem byggir á jöfnum tækifærum og sterkri stöðu kvenna.

Greinina má lesa í heild sinni hér.