Stefna Háskólans á Akureyri til 2030

Háskólinn á Akureyri er leiðandi og framsækið háskólasamfélag sem með öflugu vísindastarfi og kennslu er uppspretta þekkingar, nýsköpunar og framfara á norðurslóðum.

Háskólinn á Akureyri er drifinn áfram af óbilandi trú á tækifærin sem norðurslóðir bjóða upp á. Háskólinn er miðpunktur þekkingar, nýsköpunar og framfara, þar sem framsækin hugsun og hugrekki til að móta framtíðina fara saman.

Háskólinn á Akureyri er í samstarfi við innlenda og alþjóðlega háskóla, rannsóknarstofnanir og atvinnulíf og leggur áherslu á rannsóknir og menntun sem takast á við áskoranir samfélagsins á öllum sviðum.

Háskólinn á Akureyri er sjálfstætt náms- og þekkingarsamfélag sem leggur áherslu á gagnrýna og sjálfstæða hugsun. Menntun við háskólann miðar að því að efla gagnrýna hugsun og sköpunargáfu stúdenta. Sérstök áhersla er lögð á fjölbreytni og aðgengi að námi, með sjálfbærni og samfélagslega velferð að leiðarljósi.

Háskólinn á Akureyri er ómissandi afl sem tengir saman fólk, vísindi og atvinnulíf á norðurslóðum. Með því að stunda rannsóknir, miðla þekkingu og byggja upp sterk samfélög í síbreytilegu umhverfi leitast skólinn við að vera uppspretta þekkingaröflunar, nýsköpunar og framfara og þar með tryggja betri framtíð fyrir komandi kynslóðir.

Háskólinn á Akureyri tileinkar sér bestu þekkingu og tækni við kennslu, rannsóknir og þróun. Hann sækir fram af víðsýni og metnaði og er í fararbroddi á sviði vísinda og fræða.

Í starfi sínu leggur Háskólinn á Akureyri áherslu á að stúdentar og starfsfólk nái árangri í námi og starfi óháð fötlun, kynhneigð, kyni, kynþætti, lífsskoðun, trúarbrögðum og uppruna.

Háskólinn á Akureyri er sjálfstætt náms- og þekkingarsamfélag með gagnrýna og sjálfstæða hugsun að leiðarljósi.

Stúdentar og samfélag geta treyst því að Háskólinn á Akureyri hafi að leiðarljósi haldgóða menntun, gagnrýna hugsun, vönduð vinnubrögð og heill samfélagsins.

Háskólinn á Akureyri hefur sterka ímynd, er leiðandi í samfélaginu og fyrirmynd um sjálfbæra og umhverfisvæna starfshætti. Háskólinn leitast við að stuðla að því að minnka kolefnisspor sitt með tilliti til losunar á gróðurhúsalofttegundum, mengunarefnum, sóunar á auðlindum og öllum skaða á lífríki og náttúru sem starfsemin tekur til. Háskólinn leggur metnað í að auka sýnileika vísindastarfs sem unnið er við stofnunina bæði á landsvísu og á alþjóðavettvangi efla gagnvirk tengsl við atvinnulíf, stofnanir og samfélag.

Háskólinn á Akureyri er alþjóðlegur háskóli í fremstu röð, leiðandi í rannsóknum, kennslu og nýsköpun með áherslu á norðurslóðir og sveigjanlegt námsframboð. Aukið samstarf við fyrirtæki og stofnanir undirbýr stúdenta fyrir störf sem mæta þörfum framsækins samfélags.

Við Háskólann á Akureyri er öflugt rannsóknarsamfélag með traustum rannsóknarinnviðum og rannsóknarþjónustu. Rannsóknarmenning háskólans miðar að opnum vísindum með áherslu á alþjóðlegt samstarf þar sem rannsóknarafurðir og gögn eru gerð aðgengileg í opnum aðgangi.

Háskólinn á Akureyri er eftirsóknarverður vinnustaður starfsfólks og stúdenta sem byggir á inngildingu, samstöðu og hvetjandi menningu. Með áherslu á framúrskarandi mannauð, fjölbreytileika og styrk innra starfs, vinnur háskólinn að því að skapa fjölbreytt samfélag þar sem öll tilheyra og auðga náms- og starfsumhverfi skólans. Umgjörð og viðmót innan skólans tekur mið af ólíkum þörfum fólks og laðar að hæfileikafólk í anda grunngilda háskólans.